India ramah Covid-19 danna Damdawi chi 3 hman tum a ni

State Task Force on Immunization chu nimin khan Secretariat conference hall-ah Health secretary H Lalengmawia kaihhruaiin an ṭhukhawm a, Covid-19 hri danna damdawi (vaccine) chungchang an sawiho. India ramah Covid-19 vaccine chi thum hman tum a nih thu an tarlang.

Covid-19 vaccine siam tuma hmalakna kal mek din hmun te, India ram bika hmalakna te, vaccine a awm huna pêk chhuah dan tur leh Mizoram inbuatsaihnate sawihonaah hian, sorkar laipui kaihhruaina angin, vaccine a awm hunah damlo enkawlna lama thawkte pêk hmasak tura ruahman a nih thu sawi lan a ni.

Covid-19 vaccine chi thum - Nucleic Acid Vaccines, Viral Vector leh Inactivated Vaccine-te chu India rama hman turin ruahman a nih thu sawi lan a ni a; India ram company-te vaccine siam chu Europe ram ṭhenkhatte pawhin an beisei thu tarlan a ni bawk.

WHO-NPSP surveillance medical officer Dr Lalhlimpuii'n report pein, Ministry of Health & Family Welfare-in Covid-19 vaccine chungchangah khauh taka zawm tur ruahmanna a siam thu a sawi a, "Vaccine dawng hmasa turin health care worker te, upate leh natna benvawn nei leh damdawi ei reng ngai damlo bithliah chin a nei a, chu'ng mite chu an hming lak khawm a, sorkar laipui database-ah khung luh vek tur a ni," a ti.

Dr Lalhlimpuii chuan, vaccine chu pek hmasak turte hnenah a tahtawla pek tur a nih thu leh database-a chuang lote'n an dawn theih dawn loh thu a sawi a; Mizoramin vaccine a chan zat tur hriat a la nih loh avangin, a dawng tur zat pawh la tihfel theih a nih rih loh thu a sawi bawk.

State Task Force for COVID-19 Vaccination chuan, Covid-19 vaccine hman ṭan theih hun tur hriat a la nih loh thu tarlangin, vaccine chungchangah thu belhchian dâwl lo thehdarh lo turin mipui an ngen a; vaccine a awm hun atan Mizoram inpuahchahna a ṭha thawkhat tih an tarlang a ni.