Covid-19 Mizoram dinhmun Hripui vei 30 hmuh belh a ni
October 20, Thawhlehni khan Mizoramah swab sample 1,188 endik aṭangin Covid-19 vei mi 30 hmuh chhuah a ni a, an zinga a tam zawk chu Mizoram chhunga kái chhâwng an ni. Nimin khan mi pakua chhuahtir an ni a; hripui kai hmuh tawh 2,310 zinga mi 2,174 (94.11%) an chhuak tawh.
Covid-19 vei Thawhlehnia hmuh chhuahte chu mipa 16 leh hmeichhia 14 an ni a; ZMC laboratory-ah mi 10, TrueNAT-PCR hmangin Lungleiah panga, Serchhipah pasarih leh Hnahthialah pahnih, Rapid Antigen Test (RAT) hmangin Aizawlah panga leh Serchhipah mi pakhat a ni.
Nimin khan hripui laka fihlim tawh mi pakua chhuahtir an ni a; SRH-ZMC aṭangin mi paruk, Lawngtlai CCC aṭangin mi pakhat leh Mamit CCC aṭangin mi pahnih an chhuak.
Mizorama Covid-19 positive hmuh chhuah tawh mi 2,310-te chu mipa 1,872 leh hmeichhia 438 an ni. An zinga mi 2,174 (94.11%) chu chhuahtir an ni tawh a, enkawl mek mi 136 (5.89%) an awm.
October 20, Thawhlehnia ZMC laboratory-a Covid-19 positive hmuh chhuahte chu Aizawl khawpuia ZMC-a hmuh chhuahte chu Ramhlun South leh Dawrpui veng mi panga ve ve an ni a, mipa pathum leh hmeichhia pasarih an ni. Nausen thla 8 mi leh naupang kum 3, kum 5 leh kum 10 mi leh, tleirawl kum 15 mi an tel.
Ramhlun South-a mite chu mipa pakhat leh hmeichhia pali an ni a; chhungkuaa inkai chhâwng niin, nupa kum 33 mi ve ve leh, an fate - nausen thla 8 mi, naupang kum 3 leh kum 5 mite an ni. Dawrpui venga mite chu mipa pahnih leh hmeichhia pathum an ni a; mi pathum (mipa kum 15 & 40 leh hmeichhia kum 10 mi)-te chu chhungkuaa mi niin, mi dang pahnih chu hmeichhia kum 28 leh 50 an ni.
Lunglei Civil Hospital-ah TrueNAT-PCR hmangin 131 Bn. BSF sipai panga, kum 29-42 inkarte'n hripui an vei tih hmuh chhuah an ni a; tun hnaia state pawn aṭanga rawn lut vek niin, JNV quarantine facility-a inkhung mek, symptom nei lo an ni.
Serchhip District Hospital-ah TrueNAT-PCR hmangin Covid-19 positive pasarih (mipa pali leh hmeichhia pathum) hmuh chhuah an ni. Pathum chu Serchhip P&E Veng mi, mipa kum 12, 15 leh 39-a upate an ni a; pali chu Chanmari Venga mipa kum 36 mi leh hmeichhia pathum - kum 9, 18 leh 68 mite an ni. Serchhipa hmuh tharte hian symptom an nei lo.
Hnahthial Hospital-ah pawh TrueNAT-PCR hmangin mipa pahnih, kum 26 leh 41-a upa hmuh chhuah an ni a; Mizorama hna thawk tura tun hnaia state páwn aṭanga rawn lut, an thawhna BIPL base camp, Rawpuia khung hran mek, symptom nei lo an ni.
October 20-ah tho RAT hmangin Aizawlah Covid-19 vei mi panga (mipa pahnih leh hmeichhia pathum), kum 15-64 inkar hmuh chhuah a ni a; an vaiin Chanmari venga cheng vek an nih rualin, pahnih chu Hnahthial khua an ni thung.
Thawhlehni vêk khan Serchhipah RAT hmangin hripui vei hmeichhia kum 28 mi hmuh chhuah a ni a, Chanmari Veng mi a ni.
October 20, Thawhlehni khan ZMC laboratory-ah swab sample 323, TrueNAT-PCR hmangin district pariatah sample 178 leh RAT hmangin district pakuaah sample 687 endik a ni a, a vaiin sample 1,188 a ni.