Synod inkhawmpui ṭan a ni

Mizoram Presbyterian Kohhrana inkhawmpui lian ber, Synod Inkhawm­pui vawi 97-na chu nimin khan Dawrpui Kohhran biak-inah ṭan a ni a, vawiinah rorel inkhawm ṭan a ni ang. Palai turte nimin khan swab sample endik a ni a, Covid-19 positive an awm lo.

Synod Inkhawmpuiah hian nimin khan Nomi­nation Committee an ṭhu a, vawiinah rorel inkhawm ṭan a ni dawn. Rorel ṭan hmain moderator an inthlak ang a, moderator thar Rev. Dr C Lalhlira'n rorel a kaihruai ang.

December 11 thlenga neih tur Synod Inkhawmpuiah hian dan pangngaiah chuan palai 2,350 an awm a, Covid-19 hripui léng vangin nasa taka tihtlem niin, palai 200-250 vel tel tura beisei a ni. An dil angin Mizoram sorkar chuan mi 300 aia tam lo tel a phalsak a ni.

Rorel tur pawh hman­hmawh thlak zual 32 chauh an ngaihtuah dawn a, December 11, Zirtawpniah pas­tor nemngheh leh proba­tionary pastor dahngheh inkhawm neih a ni ang.

Synod Inkhawmpuia palaite leh buaipuitu tur mi 301-te chu nimin khan Dawrpui School-ah Rapid Antigen Test hmangin an swab sample endik a ni a, endik mi 301-te zingah hripui vei hmuh chhuah an awm lo a ni.

Kumin Synod In­khawmpuia palai turte chu - Synod puipa te, Synod Nomination Committee, SEC, Pastoral Committee leh Finance Committee-a member-te leh Synod Office-a Superinten­dent an ni.