Sawivunga'n union minister 2 a kâwm

AH&Vety minister C Lalsawivunga chuan September 24, Thawhlehni khan Union Fisheries, Animal Husbandry & Dairying minister Rajiv Ranjan Singh leh minister of state George Kurien, Minority Affairs minister Kiren Rijiju leh official pawimawhte a hmu a, Mizoram mamawh hrang hrang a thlen.

C Lalsawivunga chuan Rajiv Ranjan Singh hnenah kum 2023-24 chhunga MVU-a thawkte hlawh tur sorkar laipuiin 25% chauh a pek avang leh MVU staff-te'n October 2023 thleng chauh hlawh an lak avanga an nawrh chungchang te, African Swine Fever vanga Mizoram tawrhna leh ASF zangnadawmna chungchang te, Mizoram chu ruahtui tlak tamna a nih avangin sorkar laipui ruahman angin vaccination kalpui theih a nih loh dante a hrilh.

Rajiv Ranjan Singh chuan, MVU hlawh chungchang chu revised proposal siamin thehlut se, an lo pawmpui tur thu a sawi a, kumin 2024-25 chhunga MVU staff hlawh tur 25% sanction nghal a ni. Hmarchhak bial tan vaccination schedule hran siam dan tur ngaihtuah a nih thu leh ASF compensation chu an ngaihtuah zel tur thu a sawi a; checkpost tam zawk siamna turin NADCP scheme hmang ṭangkai turin a chah.

Panchayati Raj changtu ni bawk Ranjan Singh hi LAD minister C Lalsawivunga chuan LAD mamawhte a sawipui bawk a; VC-te enkawlna atana Rastrya Gram Swaraj Abhiyan (RGSA) chungchang sawiin, kum 2024-25 atana Central-in budget a pawmsak vbc 103.11 aṭanga 50% chu RGSA guidelines anga pe chhuak thuai turin a ngen. Ranjan Singh chuan an pek chhuah thuai tur thu a lo hrilh.

RGSA-ah hian VC house sakna tur te, thingtlanga common service centre dinna tur te, VC-te thiamna leh hriatna tipung tura training pekna tur fund te, district panchayat resource centre sakna turte leh thil dang pawimawh tak tak a tel a ni.

C Lalsawivunga hian Minority Affairs minister Kiren Rijiju leh secretary Dr Chandra Shekhar Kumar hmuin, Mizoram aṭanga PMJVK hnuaia project thehluhte a sawipui a; Kiren Rijiju chuan, Mizoram aṭanga project thehluhte a ngaih pawimawh thu leh theihtawpa a bawhzui tur thu a sawi.