Ch. Chhunga Memorial Endowment Fund hlan a ni

Mizoram chief minister hmasa ber Ch. Chhunga hriat-rengna atana zirlai chhawmdawlna tura ruahman, Ch. Chhunga Memorial Endow-ment Fund 2024 chu nimin khan Mizoram University (MZU) Examination 2024-a MA English-a gold medalist Lalnunhlua hnenah hlan a ni.

Endowment Fund hlanna hun hi MZU School of Humanities and Languages seminar hall-ah buiatsaih a ni a; MZU English department HoD Prof. Margaret L Pachuau-in a kaihruai a, MZU vice chancellor Prof. Dibakar Chandra Deka-a'n Endowment Fund Rs 36,401 chu Lalnunhlua hnenah a hlan a ni.

Prof. Dibakar Chandra Deka chuan, ṭhalaite'n an nunphungah lehkha chhiar an neih a ṭul thu sawiin, "English department-in lehkha chhiar uar thei tura zirlai an chawk phûr thiam hi a lawmawm," a ti a; tuna literature awm mek aia ṭha zawk ziak tura ṭan la turin zirlaite a sáwm.

Ch. Chhunga Memorial Endowment Fund atan hian Prof. Margaret Ch. Zama'n kum 2000 khan Rs 5,00,000 a thawh a, bank-ah dan niin, a pung (interest) aṭangin MZU English and Cultural Studies department-a zirlaite hnenah ṭanpuina hlan ṭhin a ni. Kum 2021 khan pek ṭan a ni a, kumina dawngtu telin mi pathum hnenah hlan a ni tawh.