Covid-19 No Tolerance Fortnight

Nimina Health minister Dr R Lalthangliana hoa sorkar hotute leh pawl hruaitute ṭhukhawm chuan, Covid-19 inkài darh zel tur venna atan October 26, 2020 aṭangin 'Covid-19 No Tolerance Fortnight' hman an rêl.

Health Minister chuan fimkhurna kawnga inthlahdah lo turin mipuite chah nawnin, "Hun rei tak tha thlah loa sawrkar, kohhran, NGO, khawtlang hruaitute leh mipuite theihtawpchhuaha kan ṭan tlanna in rah ṭha a chhuah a, tun thlengin khawvel leh India ram hmun dang aiin kan ziaawm zawk niin a hriat. He kan thawhrimna, tha leh zung bakah sum tam tak kan sen tawhna hi a thlawna a kal ral mai loh nan mitinten ṭan i la thar leh ang u," a ti.

Covid-19 dona kawnga hmalatu department hrang hrang report ngaihthlak a nih hnuah meeting chuan Covid-19 laka Mizoram dinhmun a derthawng lehzual nia hriat a nih avangin October 26 aṭanga ni 14 chhung Covid-19 No Tolerance Fortnight neih an rel. Hemi hun chhung hian Covid-19 dona atana sorkar ruahmanna siam hrang hrang - unlock guidelines, standard operating procedure hrang hrang leh The Mizoram Containment and Prevention of COVID-19 Ordinance, 2020 te ngaihnathiamna tel loa kalpui tum a ni.

Covid-19 No Tolerance Fortnight kalpui a nih chuan hripui inkaichhawnna (transmission chain) chhutchah theih beisei a ni a, a kalpui dan tur kimchang chu Chief Secretary kaihhruai State Executive Committee, Mizoram State Disaster Management Authority-in an duang ang.

Ṭhutkhawmah hian Covid-19 Medical Operational Team chairman Dr ZR Thiamsanga, chief secretary Lalnunmawia Chuaungo, sorkar official te, Mizoram Kohhran Hruaitu Committee leh Indian Medical Association hruaitute an tel a ni.