Ramhlun North YMA-in thupha chawi
YMA, Ramhlun North Branch chuan, September 21, 2024 zana Durtlang Leitana Synod Hospital-a thawk doctor pahnih leh an ṭhian pakhat sawisak rawnnaah an member panga an tel tih sawiin, khawtlang aiawhin thupha an chawi.
Ramhlun North YMA chuan thuchhuah siamin, an branch member-te thil tih leh chêt dan chu pawi an ti a, zahthlak an tih thu an tarlang a, "Kan member mi pangate thil tih hi engti kawng maha ngaihzam leh en liam chi-ah kan ngai lo. Hetiang thil duhawm lo hi tu chungah mah a thlen nawn tawh loh nan thil sual titute'n an phû tâwk hremna hmu ngei se kan ti," an ti.
An member-te chêt dan avangin kut tuartu te, Durtlang leh Zemabawk North khawtlang mipui lakah thuphá an chawi tih sawiin Ramhlun North YMA chuan, tharum thawhna vanga hliam Dr Laldinliana Sailo, Dr Rinngheta Renthlei leh Lalthlamuana te chu an dam ṭhat leh thuai an duhsak thu an tarlang.
Mi khawih rawntu Lalmalsawma Zote, Mark Zairemmawia, Lalvenpuia, Vanlalpekhlua leh K Vanlaltharzela te chu nimin zing khan an ko a, na takin a zilhhau tih an tarlang bawk.