Lungleiah LSDG 2024 under LMC hawng

Adviser to CM (Finance & Planning) TBC Lalvenchhunga, MLA chuan nimin khan Lunglei Convention Centre-ah Lunglei Municipal Council (LMC) huam chhunga Localisation of Sustainable Developement Goals (LSDG) kaltlanga hmalakna tur LSDG 2024 under LMC a hawng.

TBC Lalvenchhunga chuan, hmasawnna tluantling, nghet leh tlo a awm theihna tura mipui mimir huapa hmalakna - LSDG chu sorkar ruahman 'Bana Kaih' hnuaia hmalakna pêng pakhat a nih thu a sawi a, "SDG tehna hnuhnung berah Mizoram chu tehfung ṭhenkhatah kan dinhmun a ṭhat viau laiin, rethei leh hausa inkar zau zawngah kan hniam hle a, he'ng kan hniamnate hi siamrem a, hmasawn tura ngaihtuahna sèn leh hmalak a ngai," a ti.

Adviser to CM chuan, LMC councillor-te chu ward hmasawnna tluantling atan central sum hai chhuah theiha inel turin a chah a; local council-te chu LSDG target tihhlawhtlin tum ngawr ngawr lo a, data dik leh felfai a awm theih nan rinawm taka mahni nihna anga lang ngam tur te, hmasawnna tluantling leh daih rei ûm turtein a chah bawk.

Inkhawm hi Planning & Programme Implementation secretary Lalmalsawma Pachuau-in a kaihruai a; LMC chairman Lalzuithanga leh chief executive officer Donny Lalruatsanga bakah, PPI economist-cum-under secretary B Vanlalruati te pawhin thu an sawi.

LSDG hawnnaah hian Lunglei West bialtu MLA T Lalhlimpuia, LMC councillor te, sorkar official te, local council member te, tlawmngai pawl aiawh te, political party hruaitu te, MJA member-te leh Lunglei College, J Buana College leh Lunglei Nursing School-a zirlaite leh zirtirtute an tel a ni.