Thla 8 chhungin TB vei 1,628 hmu

Nimin khan Secretariat conference hall-ah State TB Forum Meeting neih a ni a; kumin January-August chhungin ngawr (tuberculosis) vei mi 1,628 hmuh chhuah a ni a, TB vei zinga mi 95 an thi tih tarlan a ni.

State TB Forum Meeting hi Health & Family Welfare secretary Sangchhin Chinzah-in a kaihhruai a; State TB officer Dr Febiola Kharkongor-in TB chungchanga Mizoram dinhmun leh TB programme hmanga hmalakna leh harsatna tawhte a tarlang.

Ṭhutkhawma tarlan danin, January-August, 2024 chhung khan Mizoramah TB vei nia rinhlelh endik 15,907 an awm a, chu'ng aṭang chuan TB vei mi hmuh a ni a, MDRTB vei mi 92 hmuh a ni bawk. Thla riat chhungin TB vei zinga mi 95 an thi a, TB vei zinga 80% tihdam an ni thung. TB leh HIV vei kawp mi 176 an awm bawk.

HFW secretary Sangchhin Chinzah chuan, ngawr natna vei dam tawhte awká a pawimawh thu leh TB programme insiamṭhat nan leh hmalakna ṭha zawk a awm theih ngei tur thu a sawi. HFW principal director Dr Vanlalsawma chuan, TB chu natna ngawichawi tak a nih avangin inrinhlelh vat a pawimawh thu a sawi bawk.

State TB officer Dr Febiola Kharkongor chuan, TB ûm bona tura hmalak meknaah hna thawhna hmuh hrang hrangah TB screening kalpui a nih tur thu te, PHC leh CHC zawng zawngah TB endikna ṭha zawk Truenat a awm theih theih hmalak a ngaih thute a tarlang a; health sub-centre-a TB damdawi dah lailâwk ṭhin a mumal loh chhan ber chu sorkar laipui aṭanga damdawi thleng a khaihlak nasat vang a nih thu a sawi.

Ṭhutkhawmah hian TB vei dam tawhte'n TB inenkawlnaa thil pawimawh an hriat leh harsatna an tawhte an sawi a; TB damdawi lakna Falkawna District TB Centre chu panna a hlat thu leh a hautak ṭhin thu te, TB Centre-a zunram thiarna awm ṭha lo an ngaihmawh thute an sawi a ni.