Sorkar laipuiin kuhva chìn a khap lo - MP K Vanlalvena

Rajya Sabha MP K Vanlalvena chuan nimin khan Aizawl Press Club-ah thuthar thehdarhtute a kâwm a; Assembly session-ah Chief Minister-in India sorkarin kuhva chìn a khap tawh ni âwmin sawi mah se, sorkar laipuiin khapna thupek a tihchhuah loh thu a sawi.

K Vanlalvena chuan, September 13, 2024 khan Union Agriculture minister Shivraj Kumar Chouhan chu a pisaah a hmuh thu sawiin, "CM Pu Lalduhoma'n India sorkarin kuhva chìn a khap tawh ni âwma a sawi chu India sorkarin a lo siam a nih chuan order sût turin ka ngen. Pu Shivraj Kumar Chouhan chuan kuhva chìn khapna thu central sorkarin a chhuah loh thu leh chutiang thuthang chu thu dik lo a nih thu hmaihma ngeiah min hrilh," a ti.

Sorkar laipuia Horticulture commissioner Prabhat Kumar pawh September 20, 2024 khan a sawipui thu sawiin K Vanlalvena chuan, "Central sorkarin kuhva chìn khapna thupek tihchhuah a neih loh thu a sawi ve leh bawk," a ti a; Mizorama kuhva chíngtute leh chìn zel tumtute tan manganna tur a awm loh thu a sawi.

Lok Sabha MP chuan, kum 2023-24 atana Mizoram puma a MPLAD fund thawk tura a thlante zingah work order pek loh an la awm thu a sawi a, "October 6, 2023 khan MPLAD fund thawk tur list Aizawl DC-ah ka thehlut vek tawh a, tih dan pangngaiah chuan Aizawl DC office hian MP fund thawktu tur list hi a kaihhnawih district thuneitute hnenah an thawn chhâwng ṭhin. MLA inthlanpui leh Lok Sabha inthlante vanga Model Code of Conduct chhuanlam vangte bakah, Central-in MP fund sem dan thar a siam vangtein hun rei tak chhung work order pek chhuah a ni lo," a ti.

K Vanlalvena sawi danin, MP fund thawh dan thar zirtir turin Mizoram sorkara official pahnih Delhi-ah training master ni turin central sorkarin Mizoram aṭangin a ko a, training an zawh hnu leh district hrang hranga MP fund khawihtute training an neihpui aṭanga thla hnih a liam hnuah pawh DC office ṭhenkhat leh BDO office ṭhenkhatin MPLAD fund-a thawk tura a thlante hnenah work order an la pe chhuak thei lo a ni.

Work order an la pe thei lo chu ṭha lo a tih thu sawiin MP chuan, "Kum hlui 2023-24 MP fund la thawh zawh loh hian kum thar 2024-25 MP fund chhuak tur a dâl tlat a ni. MP fund thawk tura work order pek chhuah muang lutuk chungchanga hma min laksak turin CM Pu Lalduhoma hnenah July 23, 2024 khan ngenna lehkha ka pe tawh," a ti.

MPLAD fund chu Mizoram khua leh veng hrang hrang hmasawnna tur a nih avang leh, tihkhawtlai loha hna thawh zawh thuai thuai a nih theih nan a ṭul anga hma laksak turin Mizoram sorkar a ngen a; a ṭul anga disciplinary action lak thleng pawha ngaih pawimawhsak turin Mizoram sorkar a phût thu MP chuan a sawi bawk.

K Vanlalvena chuan, Union Agriculture Minister hnenah Mizoram mipui kham khawp buh Mizoramah thar a nih loh thu leh central sorkar puihna an mamawh thu a thlen tih sawiin, "Mizorama buh chíngtute ṭanpuina atan minimum support price emaw, pawisaa ṭanpuina pek kan mamawh thu ka thlen a, PM-KISAN scheme hmanga Mizorama buh chíngtute min puih theih tur thu a sawi. Mizoram sorkar tan hmalakna phûrawm leh loneitute ṭanpuina tur ṭha tak a nih dawn avangin hmalak thuai ni se ka duh," a ti.