Kan ṭhalai, hlawhtlin tak tak tumte kan thlahthlam dawn lo - Chief Minister

Chief minister Lalduhoma chuan, "Kan ṭhalai, hlawhtlin tak tak tumte hi kan thlahthlam dawn lo," a ti a, sorkar flagship programme - Bána Kaih (Handholding) Scheme tum ber pakhat chu mahni kea ding thei tura ṭhalaite puih a nih thu a sawi.

CM Lalduhoma hian nimin khan Thanghlianga Sailo Rûn, Champhai Tlangsama MZP Assembly vawi 68-na a hmanpuinaah thu sawiin, "Kan ṭhalai, hlawhtlin tak tak tumte hi kan thlahthlam dawn lo. An bánah kan kai ang a, kawng kan kawhhmuh ang a, kan khai chhuak dawn. Chu chu kan flagship scheme-in a tum ber pakhat a ni. Mi thatchhia, tum bulbâl nei lo, thên vel mai mai tan beisei tur a awm lo a, chanvo an nei ve lo," a ti.

Bána Kaih Scheme chu hmang ṭangkai tura ṭhalaite chahin Lalduhoma chuan, "Sorkarin loan a pung awm lo leh interest rulh ngai lo te, guarantor-a sorkar a ṭanna turte kan chhawp. Chuti khawp chuan leiba karah, sum harsatna karah sorkar hian a theih ang zawng zawng, a neih chhun ang ang a phal a, a ti mek. Tu emaw sawisak lam khan awmzia a nei dawn lo a, enfiah kan dâwl ang," a ti a; kum 5 a ral hnuah mahni kea ding thei leh thawh chhuah nei nih tum turin zirlaite a chah.

Chief Minister chuan, tunlaiah Mizoramah mipa an thi nasa tih sawiin, "Vawiinah chuan chhungkaw eibêl ber chu hmeichhia an ni tawh a, a lawmawm rualin mipa kan tláwm lutuk, ṭan la thar ang u. Kan ram kan duat a ngai a, thing leh mau leh nungcha kan tichereu nasa a, ram kan enkawl danah siamṭhat ngai a tam lutuk. Ṭhangthar fing zawkte'n hengte hi rawn vei u la, kan ram neih chhun hi duat takin enkawl ang u," a ti.
Lalduhoma chuan fuihna thu sawiin, "MZP hi tute emaw inham puarna hmun, mimal hamṭhatna dap nana an hman mai maina atan in phal tur a ni lo," a ti a; "I hlawhtlinna kha Mizoram hlawhtlinna a nih ang bawkin, i hlawhchhamna kha Mizoram hlawhchhamna a ni a, mi dangte kutkawiha he ram hi tihhmasawn i tum ringawt chuan i beisei ang hmasawnna i hmu ngai lo ang," a ti bawk.

MZP Assembly vawi 68-na hun hnihna chu vice president C Lalremruata'n a kaihruai a, president H Lalthianghlima'n thu a sawi. Chin Baptist Church, USA-in Champhai district-a sikul 15 tana Myanmar raltlan ṭanpuina Rs 150,000 an pek chu Chief Minister-in MZP Headquarters, Champhai hotute hnenah a hlan. MZP-in CM hnenah CM's Relief Fund atan Rs 20,000 an hlan ve nghal bawk.