NH dan tumtute leh police an innawr

Kolasib District Land Owners Association (KDLOA) member-te chuan Vairengte leh Sairang inkar NH kawngpui thlúr lia siam tur kaihhnawiha an harsatnate chinfel phûtin nimin khan Bualpui Seṭhawnah NH-06 kawngpui dan tumin an pungkhawm a, police-te nen an innawr buai. Sorkar aiawhte nen an inbiak hnuah tlai dar 3:30-ah an ṭîn darh.

Thu dawn danin, Vairengte-Sairang inkar NH kawngpui laih zauhna tura harsatna chinfel an phût avangin ram neitute chu kawngpui dang turin nimin zing kar aṭangin an thawk chhuak a, police ṭhahnem tak an awm avangin an tum hunah kawngpui an dang thei lo. Chhun dar 11 velah hun rei lo te chhung police-te nen an innawr buai a, hliam an awm lo.

KDLOA member pungkhawmte chu roadside reserve an duh loh thu te, ram lakna tura khuahkhirhna chu sorkarin a hlih an phût thu te, Mizoramin kawngpui ṭha a mamawh thu te, four lane kawngpui a la awm theih loh chhan chu Environment, Forest & Climate Change department vang a nih thutein an au rual a ni.

KDLOA hruaitute chu Seṭhawnah Kolasib bawrhsap Robert C Lalhmangaiha, SP David H Lalthangliana leh sorkar official dangte nen an inbia a; Bawrhsap chuan, an harsatna chu sorkarin a hriat thu leh, Supreme Court thu angin nimin (September 25) khan high level meeting neih a nih dawn thu a sawi. Chawhnu dar 3:30-ah KDLOA member-te chu an ṭîn darh a ni.

Inbiaknaah hian Kolasib Bawrhsap chuan, ram neitute harsatna chu Mizoram sorkarin a chinfel theih loh a nih thu sawiin, Supreme Court order awm tawh a nih avangin hrethiam turin a ngen a; Supreme Court-in thla thum chhungin EFCC leh Land Revenue & Settlement department thu inchuh chingfel turin a ti a, department pahnihte'n an chinfel hun nghâk turin a ngen bawk.

NH kawng dan tihtawp chungchangah ziakin thu dah an nei a, chutah chuan KDLOA chairman James Vanlalringa bakah, Kolasib DC leh SP ten hming an ziak a ni.