MzSRLM hnuaiah SHG thar 467 din tawh
Mizoram State Rural Livelihood Mission (MzSRLM) chuan, kum 2014-15 chhung khan self help group (SHG) 467 an din hman a, tun hmaa ding ṭhin SHG 250 an âwi nung tawh niin an chief executive officer Nghaklianmawia chuan a sawi.
Nghaklianmawia sawi danin, MzSRLM hi district pahnih - Serchhip leh Kolasib district-ah kalpui a ni a; kum 2014-15 chhunga SHG 467 leh SHG awm sa 250 an tihnun thar lehte nan district pahnihah hian SHG 717 a awm ta a ni. Chung SHG 717 hian chhungkua 5,054 a huam a ni.
MzSRLM chuan community resource person turin SHG member 16 phaiah training-in an tír tawh a; chung mi 16-te chuan an training zawhah hmun danga SHG-te an zirtir leh chhawng ang.
SHG 717-te hian bank account an hawng vek tawh a, an zinga 411-te chu ṭanpuina sum (revolving fund) pek an ni tawh. Revolving fund hi member tam tan azirin Rs. 10,000-15,000 inkar an pe ṭhin a; a vaia an pek chhuah tawh zat chu cheng nuai 59.25 a ni.
Zawhna chhangin Nghaklianmawia chuan, MzSRLM-in a tum ber chu miretheite chawikan a ni tih sawiin, "Bank loan la thei tura hmeichhiate zirtir leh enkawl hi a tum lian ber a ni," a ti. SHG-ah hian hmeichhiate chauh an tel thei a, member 6-10 vel an awm tlangpui tih a sawi.
MzSRLM avangin thingtlang nu tam tamin sum enkawl dan, sum lak luh leh deh chhuah khaikhin dan, felfai zawka sum vawn dante an thiam phah tih sawiin, MzSRLM CEO chuan, "An pawl member zingah zirlaibu leina tur te, damlo enkawl ngai an awmtein ṭhenawmte ta pûk ngai loin an pawl sum an pûk mai ṭhin a, remchang an tiin, hlâwk an ti hle a ni," a ti.
Mizoram State Rural Livelihood Mission hi August 18, 2011-ah din a ni a; pilot project tihna Serchhip leh Kolasib district-ah hian RD Block palia khaw 70 a huam a ni.