Bomb hmanga Tut luia sangha man Fisheries-in bawhzui, FIR thehlut lo

Mamit district-a Phaizau khawtlangin Tut lui an humhalh huam chhunga November 21, 2020-a bomb hmanga sangha man chungchang chu Fisheries department-in an ngaihven a, FIR erawh an thehlut lo.

Hetih lai hian, sangha mannaa tel vea sawi MLA H Lalzirliana-te lam chuan sangha man chungchang chu bawhzuisak tawh lo turin Phaizau khawtlang hruaitute an ngen.

Tut luia bomb hmanga sangha man chung­changah hian Mamit bialtu MLA H Lalzirliana a tela sawi a nih avangin PC party chuan, mipuiin thu dik an hriat nan chhui chian a, dikna rorelna lekkawh ngei a ṭula an hriat avangin, an senior vice president Vanlalruata hmingin Mamit DFO hnenah chhui chiang a, dan hmanga hma la tura ngenna an thlen a ni.

Bomb hmanga sangha man thua department hmalakna chungchang Vanglaini palai zawhna chhángin Fisheries Di­rector chuan, an thli­thlai a, an ngaihven mek thu a sawi a, "A theih ang ang chuan kan bawhzui ve. Mamitah district officer kan nei," a ti. FIR an thehluh leh thehluh loh zawhna chhángin, "FIR tak chu kan la ti lo chu a nia," a ti. 

Tut luia sangha man avang hian Phaizau VC & All NGO Joint Committee chuan MNF Phaizau unit chu December 4, 2020 ral hmaa Rs. 10,000 chawi turin an hriattir a ni. 

Phaizau MNF unit-in Rs. 10,000 chu an chawi tawh thu sawiin Phaizau YMA hruaitute chuan, "Kan hun tiam ral hmain chawi tura kan tuk zat an chawi," a ti a; an khaw chhung bikah chuan action an lak fel tawh avangin an bawhzui tawh dawn loh thu a sawi.

Phaizau MNF unit-in Rs. 10,000 an chawi avangin bomb hmangin sangha an man ngei tih an inpawm tihna a nih leh nih loh zawhna chhangin Phaizau YMA hruaitute chuan, "A ni ber ang chu. Cháwi tur kan tih an rawn cháwi a, ngaihdamte pawh an rawn dil tho a ni," an ti.

Bomb hmanga sangha mannaa tel ve nia sawi Mamit bialtu MLA H Lalzirliana emaw, a aiawhte nen emaw inbiakna an neih leh neih loh zawhna chhangin YMA hruaitute chuan, "Hrethiam tur leh bawhzuisak tawh lo turin, kaltir zel tawh lo tur chuan min rawn ti ve tho," an ti a; anni pawhin media lamahte an darh tâkah chuan, an rin aia sanga thil a kal thu an hrilh tih an sawi bawk.

Sorkar anga action la tura ngenna thehluttu PC party tarlan danin, bomb hmanga sangha man chu Explosive Act, 1884 te, Mizoram Forest Act, 1955 te, Wildlife (Protection) Act, 1972 te, Biological Diversity Act, 2002 leh, The Mizoram Fisheries Act, 2002-te kalh a ni a; kum 7 thleng tàn leh Rs. 2,00,000 thleng chàwi theihna a ni.