KHAWTHLIR

NLUP sem
Nimin khan Saiha district-a Industries department hnuaia NLUP ṭanpuina dawng tur, chhungkaw 129 hnenah Rs. 38,01,000 sem a ni. NLUP dawngtute hi petty trade thlangtu mi 109, puanṭhui thlangtu mi pakua, steel fabrication thlangtu mi pathum, automobile thlangtu mi pahnih leh, beauty parlour, bakery, tinsmithy, electronics leh blacksmithy thlangtu mi pakhat ṭheuh an ni.

Tui ren ngai
Thawhṭanni zana thlipui tleh avangin Greater Aizawl Water Supply Scheme-a kawlphetha pekna line a chhia a, hei vang hian GAWSS Phase I & II aṭangin tui a pump theih rih loh. PHE department chuan mipuite chu renchem taka tui hmang turin an ngen.

Platinum jubilee
Darlawn branch YMA chuan nimin aṭang khan an branch kum 75 tlinna, platinum jubilee an lawm ṭan a, vawiinah an chhunzawm ang. Nimina jubilee lawmna hi bialtu MLA RL Pianmawia'n a hmanpui. Darlawn khuaa YMA branch pathum - Darlawn branch, Venghlun branch leh Chhim Veng branch-te chuan a huhoin an lawm a ni.

Heroin man
Central YMA hnuaia SRS duty-te chuan nimin khan Bazar Bungkawnah heroin hawng li an man. Rruihhlo neitu, Thanpari, Sazaikawn, Lunglei nia insawi an man bawk. Ruihhlo neitu hi home-ah an dah a ni.

Chhuak dawn lo
The Zozam Times chanchinbu chu Thawhṭanni zana ruah sur leh thli tleh avanga power supply an neih loh avangin vawiinah chanchinbu an tichhuak thei dawn loa, mipuite hriatthiamna an ngen.

SEC website
State Election Commission chuan an website hlui thlakin, address thar an siam a, www.sec.mizoram.gov.in an hmang tawh dawn tih an tarlang.

Thisen pe
Darlawna Salvation Army Central North Division SAY Council chuan nimin khan Aizawl Civil Hospital tan thisen unit 60 an pe a, a petute mipa 46 leh hmeichhia 14 an ni.

SEC-in DGP ngen
Mizoram State Election Commission (SEC) secretary H Darzika chuan tun hnai khan DGP hnenah lehkha thawnin, inthlanna muanawm, felfai leh dik a awm theihna atana law & order ṭha taka kengkawng turin a ngen.