Champhai Zotlang Sports Complex enfiah

Champhai District Sports Committee (CDSC) leh UDPA engineer-te chuan, nimin zing khan Champhai Zotlang Sports Complex siam mek an endik a; a hungna (fencing) plaster chu ṭha tawk loa an hriat vangin siam ṭha turin an hriattir a, contractor chuan an siamṭhat nghal tur thu a sawi.

CDSC chuan Champhai Zotlang Sports Complex sak mek chu ṭha tâwk loa an hriat avangin Thawhṭanni khan Champhai District Urban Development Officer (DUDO) an hmu a, statdium ṭha taka sak a nih theihna atana hmalakpui turin an ngen. Inbiaknaa thutlukna angin stadium sak mek chu nimin zing khan CDSC hruaitute leh UDPA engineer-te'n an enfiah a ni.

Fencing plaster-na atana an balu hman chu a ṭha tâwk lo tih leh cement an telh tlem tih hriat a nih avangin, tiṭha leh turin contractor an hrilh a ni.

Champhai Zotlang Sports Complex hi cheng vbc. 19.2 senga siam tur a ni a, tun dinhmunah 75% vel hna thawh tawh a ni. Khelmual tur tihzawl hna zawh a ni tawh a, gallery pawh a tam zawk chu cement work zawh tawh a ni.