Magisterial enquiry din dawn leh dawn loh a la sawi theih loh - HM

September 21, 2024 zana doctor pahnih leh an ṭhian pakhat kut thlak rawn chungchang chhui chiangtu tur judicial/magisterial enquiry din turin YMA, Durtlang Branch leh Zemabawk North khawtlangin sorkar an phût a; Home minister K Sapdanga chuan, magisterial enquiry din a nih dawn leh dawn loh sawi theih a la nih loh thu a sawi.

Insawisak rawn chhui chiang turin YMA, Durtlang Branch chuan magisterial enquiry din turin sorkar an phût a; Zemabawk North khawtlang chuan judicial/magisterial enquiry leh special investigation team din an phût a, chawlhkar khat chhung sorkar an ngaichâng dawn a ni.

Home Minister hian nimin zing khan a inah thuthar thehdarhtute a kâwm a; zawhna chhangin, "Magisterial enquiry phûtna hi official-in lo thleng se, sorkarin ṭul nia a hriat chuan a ngaihtuah ang a, tunah chuan official-a kan la dawn loh avangin kan din ang, kan din lo ang tih sawi theih a la ni lo," a ti.

K Sapdanga chuan, pawi sawi lote damdawi-ina enkawl ngai khawpa kutthlak rawnna a thleng hi sorkarin pawi a tiin a ngai thutak tih sawiin, "Pawi khawihtute zingah kan police a lo tel ve hi sorkarin a ngai thutlak hle a ni. An chungthu hi danin a remtih ang chin sang ber zela kalpui tum a ni ang," a ti a, police inhnamhnawih Sailianpuia Sailo chu suspend nghal a nih thu a sawi.

Minister chuan, "September 23, Thawhṭannia medico legal case injury report la tur ni âwm taka kal constable-in doctor-te leh thawktu dangte rilru hliam zawnga ṭawngkam a han thlah ni âwma tarlan pawh hi chhui chian a ni ang... Constable hi tirh a ni nge, ama thua lo kal nge report kan la dawng lo a, report kan dawn hunah kan ûm zui zel ang," a ti.

Zawhna chhangin K Sapdanga chuan, "Police leh police nih vanga inṭanna a thleng lo ang. Case hi a tira register a nih danin bailable case a ni a, man an ni a, bail-tu an awm bawk si chuan danin a phal anga bail-tir an ngai. Tunah hian man an ni lo tihna a ni lo a, bail mai an ni," a ti a, an chungthu dan ang taka ngaihtuah tum a nih thu a sawi.

Home Minister chuan, "Krismas hlim tlang taka kan hman theihna turin tun aṭangin dan kenkawh kawngah sorkarin theihtawp chhuah a tum," a ti a, mipui thlàwpna leh ṭawiawmna a ngen.

YMA, Durtlang Branch chuan thuchhuah siamin, an member-te râwng taka sawisak an nih avangin Durtlang mipui rilru a nat thu leh, kutthlaktu mi parukte chu an phû tâwka hrem ngei an phût thu an tarlang a; "Sorkarin kar khat chhung ngeiin a chhui chiangtu tur magisterial enquiry din a, chhui hna thawk nghal turin kan beisei a, kan ngaichâng dawn a ni," an ti.

Durtlang YMA chuan, "Buaina veng tur zawka ngaih pawi khawihtu zinga tel police-a ṭang lai Sailianpuia Sailo leh kut tuarte ṭawngkam mawi lo taka vau/sawiṭhaihtu police constable Lalruatdika te hi police hna thawk zel tlâkah kan ngai lo," an ti. Tunlaia mi tibuaia kut thlak rawn a awm ṭhin chu ṭha lo an tih thu sawiin, chutianga tih chíngte'n an sim ngei theih nan ruahmanna ṭha siam thuai turin sorkar an phût tih an tarlang bawk.

Zemabawk Local Council leh NGO-te chuan thuchhuah siamin, an veng tlangval Dr Laldinliana Sailo leh a ṭhiante pahnih sawisak rawn chungchangah judicial/magisterial enquiry din bakah, special investigation team (SIT) din an phut thu an tarlang.

Zemabawk LC & NGOs chuan, "Duty lai insawisak rawn a nih avangin judicial/magisterial enquiry sorkarin din ngei se kan ti. A rang lama chinfel a nih theih nan SIT dina prosecution chak taka kalpui ni se kan ti," an ti a; sawisatute thubuai siamsakna dan tlawhchhan chu ennawn an duh thu an sawi.

An thil phûtte hi a rang lama thuneitute'n an tihpuitlin an beisei thu sawiin Zemabawk khawtlang chuan, September 25 aṭanga kar khat chhunga hmalakna a awm lo a nih chuan an kal zel dan tur an rêl dawn thu an sawi a; a ṭhiante nunna chhanna atana an member Dr Laldinliana Sailo inpekna chu an chhuan thu an tarlang bawk.