Thawhtan zan thlipui vangin chhiatna
April 20, Thawhṭanni zan dar 9 vela Mizorama thlipui tleh vangin hmun hrang hrangah in chhia eng emaw zat a awm a; mihring thi an awm hriat a ni lo a, hliam tênau tuar erawh an awm thu dawn a ni.
Thlipui hi Aizawl leh a chhehvelah a thawk na ber a, district dangahte chuan a na lutuk loa thu dawn a ni. Thli hian MNF office Mizo Hnam Run leh Vanapa Hall inkar kawngpui sira Sasua thing lian ding chu a len tlu a, kawngpui a hnawh vek a; nimin zing khawvar aṭangin thenfai hna thawh a ni a, nimin vek khan lirthei kaltlang theiha thenfai a ni.
Thing tlu avang hian nimin zing sikul kal hun leh office kai hunah traffic a jam nasat phah a, chhim lam pana kal lirtheite chu Assam Rifles gate chhungah tlan luhtir an ni.
Thli tleh hian Aizawla Govt. Complex-ah in 28 a tichhia a, chung zinga pathum chu luah tlak loh khawpa chhia a ni. Presbyterian, Salvation Army leh UPC biak-inte a tihchhiat bakah, hliam tênau tuar pakhat a awm nia thu dawn a ni. In chhiate hi khawtlangin nimin vek khan hnatlangin an siam ṭha.
Thliin a tihchhiat tam zualna veng dang, Edenthar Vengah chuan in 30 vel a chhia a, chung zinga paruk chu luah zui tlak lohin a chhia. In chhiate hi nimin khan veng mipuite'n hnatlangin an siam ṭha nghal a, bialtu MLA, minister Lal Thanzara leh Disaster Management & Rehabilitation minister Ngunlianchunga ten tlawhin, ṭanpuina an pe.
Edentharah hian Thawhṭan zanah hian mi tlawmngaite thawk chhuak nghalin in chhia thawm theih ang angte an thawm nghal a; nimin lamah an chhunzawm.
Ramhlun Sports Complex-a gallery chung rangvate pawh thliin a lên chhe nasa hle a, khelmual chhungah rangva leh a bante hi a innghah avangin inkhelh theih a ni lo. Hei vang hian he khelmuala Inter-Branch YMA Football Tournament nimina khelh ṭan tura ruahman chu Republic Veng field-ah sawn a ni.
Bethel Camping Centre, Chawnpuia hmeichhe awmna in chung thliin a lên darh a, mihring thi leh hliam an awm lo.
Khatla Presbyterian Kohhran-in Palavai Pawl inkhawmpui an thlenna tura biak-in kawta pandal an sak chu a lên chhe nasa hle a; a chung khuhna tura rangva an dahte chu biak in chhehvel hmun hrang hrangah a len darh a ni.
Thlipui hian Chawlhhmunah pawh in 16 a tichhia a, chung zinga in paruk chu luah tlak loh khawpin a chhia. In chhiate chu nimin khan Chawlhhmun khawtlangin hnatlangin an senghawi a, an thawm ṭha nghal. Chawlhhmunah vek hian electric ban pathum a tlu bawk.
Aizawl chhim lam veng hrang hrangah in chhia leh thil dang chhia report a awm nual a, electric ban tlu pawh eng emaw zat a awm.
Heng bakah hian, hmun hrang hrangah thing tlu leh thing zár tlain thil a delh chhiat a awm a, thil tlain lirthei a delh chhiatte a awm bakah two wheeler a len tluk te, mimal in a tihchhiat tam tham tak a awm bawk.
Mamit district-ah chuan Reiek PWD quarters pakhat a chhia a, Reiek chhehvel khaw dangah pawh thil tihchhiat a nei nuala thu dawn a ni. Kolasib district-a South Chhimluangah chenna in pahnih a lên chhe vek a, in dang pahnih a tichhe nual bawk. Thingdawl khuaah pawh in pakhat a chhia.
Thlipui hi Mizoram chhim lam Lunglei, Lawngtlai leh Saiha district-ahte chuan a thawk na lo niin an sawi.
Thli tlehin thil a tihchhiat dan hi nimin khan Disaster Management & Rehabilitation department-a thawkte'n an khawn khawm a; mahse, tlai dar 4:30 velah DMR directorate-ah Mizorama chhiatna thlen dan report an dawn khawmte zawhfiah tur an awm mumal tawh lo a, hei vang hian Vanglaini chuan sorkar lam aṭangin official report a hre thei ta lo a ni.