World Pharmacists Day hman a ni

Nimin kha World Pharmacists Day a ni a, Mizoram State Pharmacy Council hmalaknain Bawngkawn South YMA Hall-ah hman niin, Health & Family Welfare minister Lalrinpuii'n a hmanpui.

Health Minister chuan, pharmacist-te chu damlote tana damdawi lam thiamna bik nei leh zir chianga hre chiang bertu an nih avangin khawtlang tan ṭangkai zawka hma la zel turin a fuih a; district hospital tinah pharmacist-te an awm a pawimawh thu sawiin, Mizorama ruihhlo leh HIV hluar zel chungchangah pawh pharmacist-te chu khawtlang, sorkar leh mi dangte tan an thiamnate hmang zel turin a chah.

Pharmacists Day hmanna inkhawm hi Mizoram State Pharmacy Council vice president Dr H Lalhlenmawia'n a kaihruai a; MSPC president Lalsawma bakah, Dr Lalnunpuii leh F Lalliantluanga ten thu an sawi. RIPANS-a Department of Pharmacy, Laithangpuii College of Pharmacy, Mizoram Institute of Pharmaceutical Science, Mizoram Pharmacy Council hotute leh mi pawimawh dangte an tel.

World Pharmacists Day hi kum 1992 aṭang khan International Federation of Pharmacists huaihawtin kum tin hman ṭhin a ni a; kumina Pharmacists Day thupui chu 'Pharmacist: Meeting Global Health Needs' tih a ni.