COTPA bawhzui dan tur sawiho

Champhai District Anti Tobacco Squad leh District Level Task Force chu nimin khan Champhai DC H Lalengmawia hoin DC conference hall-ah an ṭhukhawm a; squad drive neih zel dan tur te, Anti Tobacco Squad member list siamṭhatte leh COPTA Section 7 chung­changa hmalak zel dan turte an sawiho.

H Lalengmawia chuan, vaihlo khuahkhirh kawngah Champhai district-in hma a la ṭha hlea a hriat thu sawiin, "Inzirtir taimakin rah ṭha a chhuah ṭhin a, hma latu hmasa an awm a pawimawh. Tunlai boruak duhawm lo tak hriat tur awm ṭhin karah chhungkaw tinin nun uluk nacháng kan hriat thar a pawimawh a ni," a ti.

MSTCS district coordinator Vanlalmuanawmi chuan, Champhai chu ramri hnaiha awm a nih avangin zûk leh hmuam a luh tam thu sawiin, "Zûk leh hmuam káwrah hian COTPA Section 7-in a phal loh, vaihloin hriselna a khawih chhiat theih dan tarlang loa hralh khapna dan chu a bawhchhia a ni," a ti a; warning label târ loha hralh chhuak an awm chuan pawisa chawitir bakah, tàntir theih a nih thu a sawi.