Inhnûkdâwk tura ngenin inhnuhdawh tum lo

Ruantlang Mualvenga tlawmngai pawlte leh political party chuan an veng mi, V/C inthlana INC ticket-a nomination file-tu C Thanngura chu inhnûkdâwk turin an ngen a, C Thanngura erawh chuan inhnuhdawh a tum lo.

Ruantlang Mualveng NGO leh political party hian Ruantlang aṭanga V/C hran neih phûtin April 30, 2015-a V/C inthlanah vote thlak loh ni se an ti a; mahse, an veng aṭangin INC ticket hmangin mi pakhatin nomination a file a ni. Nomination file an awm chung­changah NGO, political party leh kohhran hruaitute ṭhukhawmin, nomination file-tu chu inhnûkdâwk turin an ngen a ni.

Inhmuhkhawmnaah hian nomination file-tu pawh hi koh niin, thusawina hun pek a ni a, inhnuhdawh a tum loh thu a sawi. Ruantlang Mualveng Congress unit chuan an party aiawha candidate atan an pawm loh thu an hrilh ve bawk.

Ruantlang Mualveng NGO leh poltical party-te chuan thuchhuah siamin, "C Thanngura'n V/C member nih tuma nomination a file hi Mualveng mipui chuan khawtlang min zahlohna leh hmuhsitnaah kan ngai. Mualveng hminga V/C nih tuma nomination a file lui tlat hi kan pawm lo a, a inhnukdawk dawn lo a nih chuan a chungchang hi kan la ngaihtuah leh dawn a ni," an ti.

An thuchhuahah chuan YMA president Lal­engmawia, MHIP pre­sident Laltlan­chhungi, MUP secretary Lalthanchhunga, Mual­veng Welfare Commit­tee vice chairman C Hrangvuana leh Mualveng Wel­­fare Committee sec­re­ta­ry Lalthianghlima ten hming an ziak a ni.