Serchhipah NEDRP chungchang zirho a ni

North Eastern Space Applications Centre (NESAC) leh Mizoram State Remote Sensing Centre (MiRSAC) chuan, nimin khan National Infomatics Centre, Serchhipah North Eastern District Resources Plan (NEDRP) chung­chang zirhona an buatsaih a, Serchhip DC Juhi Mukherjee-in a hawng.

Juhi Mukherjee chuan, NEDRP chu disaster management plan te, development plan hrang hrangte leh thil dang ṭangkai tak tak atan hman theih a ni tih sawiin, "District chhung hmasawnna thlentu a nih ngei ka beisei. NEDRP application hi DC office-ah install a ni dawn a, line department hrang hrangte zingah a chhawr ṭangkai duh an awm chuan an duh hun hunah hman theih a ni," a ti.

Meeting-a tarlan dan­in, NERDP-ah hian data pawimawh chi hrang hrang - administrative data, infrastructure data, land resources data, water resources data, bio-diversity data, terrain data, planning input bakah, data pawi­mawh dang tam tak dah niin tuna mi hi version pakhatna a ni. Version pahnihna an peihfel hunah tun aia kimchang zawka thuam a ni ang.

NEDRP hi Mizoramah a thawh khat nan Serchhip, Kolasib leh Saiha district-ahte kalpui a ni a, district dangah pawh kalpui leh thuai tura ruahman a ni.