KHAWTHLIR

Thisen pe

ICFAI University, Mizoram NSS Unit leh Red Ribbon Club-te chuan nimin khan an hmunah thisen pek rûnpui an huaihawt a, Civil Hospital, Aizawl tan thisen unit 100 an pe a, petute mipa 77 leh hmeichhia 23 an ni.

Mîm Kût discount pe turin inngen

Mizoram Merchant Association Gen.Hqrs chuan, kumina Mîm Kût pualin September 27-30, 2024 chhungin bungrua zawng zawngah discount pe turin sumdawngte an ngen a; "A bikin thlân cheina lam chi pangpar leh a tihfaina hmanrua, ei leh in, thil chi hrang hrangte special discount pe turin sumdawngte kan inngen a ni," an ti. Mîm Kût hi Mizoram sorkar bultumin September 30, 2024-ah hman a ni ang.

Cleanliness Week

Urban Development & Poverty Alleviation department bultumin Lawngtlai DC Cheemala Siva Gopal Reddy chuan nimin khan Lawngtlai DC Complex-ah 'Cleanliness Week' a hawng a; kal khawmte'n faina lama thutiam 'Swachhata Pledge' an sawi rual. Bawrhsap chuan, faina leh thianghlimnaah hmasawnna tur a la tam thu sawiin, "Sorkar, NGO, kohhran leh khawtlang mipuite ṭanho a ngai," a ti.

Chhuak turin ti

Champhai bawrhsap VL Remliana chuan The Mizoram (Prevention of Government Land Encroachment) Act, 2001, Section 7(1)&(3) tlawhchhanin Champhai Bethel Venga DC pisa hmun hluia huan siamtute, lirthei leh bungrua dahtute chu ni 5 chhunga chhuahsan turin a hriattir a; DC hmun hlui chu sorkar ram a nih angin sorkarin Champhai khawpui mamawh auditorium sakna atan hman a nih dawn thu a tarlang.

Ran chhiarpui

AH&Vety department chuan nimin khan Lungleia END conference hall-ah ran vulh chhiarpui (livestock census) kalpui tura Lunglei district-a enumerator-te tan training an buatsaih. Lunglei, Siaha, Lawngtlai leh Hnahthial district aṭangin enumerator 39 an tel a, vawiinah chhunzawm a ni ang. Livestock Census hi kum 1919 aṭangin kum 5 danah neih ṭhin a ni a, kumina chhiarpui hi October thlaah ṭan tum a ni.