Home Minister-in ruihhlo laka mipate fihlim nan pui turin hmeichhiate a sáwm

Home minister K Sapdanga chuan Mizoramah kumin chhungin heroin kg 60 chuang man a nih tawh thu leh Mizo mipuite'n ruihhlo an thihpui nasat thu sawiin, mipate ruihhlo laka an fihlim theih nan pui turin hmeichhiate a sáwm.

K Sapdanga hian nimin khan Champhai Tlangsama MZP Assembly vawi 68-na a hmanpuinaah thu sawiin, ruihhloin Mizo ṭhalaite a tihbuai nasat thu a sawi a, "Heroin hi kuminah kg 60 chuang man a ni tawh. Heroin hian kan ṭhalaiteah nghawng ṭha lo a nei nasa a, kan zirlaipui tam tak kan chàn phah tawh. Kan police hotute nen kan sawiho pawhin, kan buaipui ber chu zirlaite leh ṭhalaite nunna chhanna atana ruihhlo do a ni," a ti.

Piang zat record-ah mipa an tam zawk laiin, vote nei thei rual an nih chiahin mipa aiin hmeichhia 20,000 chuangin an tam tawh tih sawiin Minister chuan, "Mipate hian ngam loh kan nei a, kan thihpui nasa. Ruihhlo lakah fihlim turin mipate i intiam thar leh ang u," a ti a; Mizo mipate ruihhlo laka an fihlim theih nana pui turin Mizo hmeichhiate a sáwm a ni.

K Sapdanga chuan, ram leh hnam humhalh a pawimawh thu a sawi a, "Ram humhalhna lam kan ngaithla nasa a, hnam humhalhna lamah pawh theihtawp kan chhuah a ngai. Ram leh hnam humhalh turin mahni kan inhumhalh a ngai a, taimak, dawhtheih leh thawhrim a ngai," a ti a; thawhrimna tel loin hlawhtlin theih a ni lo tih hre reng turin zirlaite a chah.

Home Minister chuan, zirna lamah ṭan lak a ṭul thu sawiin, "DC leh SP-ah Mizo awm tur kan awm tawh mang lo. Hmun ṭhenkhatah khawtlang hruaitute'n DC leh SP atan Mizo ngei kan duh an ti ṭhin a, mahse, awm lo kan ngen ṭan tawh. Direct-a central service-a tling kan neih lohna a rei tawh a, hnam dangin an tih theih chu tih theih tum ang u," a ti.

MZP Assembly hi MZP treasurer Zairemthanga'n a kaihruai a; MZP adviser C Lalrokhuma'n Assembly thupui, ‘Ram leh hnam tan Mizo zirlaite’ tih a sawi a ni.