Commonwealth Parliamentary Association Annual Conference vawiinah ṭan a ni dawn

Vawiin leh naktuk hian Mizoram Legislative Assembly-ah Commonwealth Parliamentary Association (CPA), India Region, Zone-III Annual Conference vawi 21-na neih a ni dawn a; he hun hmang tur hian Lok Sabha speaker Om Birla, Rajya Sabha deputy chairman Harivansh Narayan Singh leh sorkar laipui hotu dangte nimin khan an rawn thleng.

Commonwealth Parliamentary Asso-ciation, India Region, Zone-III Annual Conference-a tel tura rawn kal Lok Sabha leh Rajya Sabha Deputy Chairman-te chu nimin khan Mizoram Assembly speaker Lalbiakzama, deputy speaker Lalfamkima, Lok Sabha MP Richard Van-lalhmangaiha leh sorkar hotute'n Lengpui Airport-ah an lo hmuak a ni.

CPA Annual Conference-ah hian vawiinah 'Inclusion of the Northeast Region in the India-ASEAN Vision for Trade and Cooperation' tih sawiho a ni dawn a; naktukah 'Merging the Ministry of DoNER with NEC for better strategic planning and coordination of various projects in the region' tih sawiho a ni ang. Vawiin hian Lok Sabha Speaker-in press conference a nei bawk ang.

CPA inkhawmpui neih tur kaihhnawihah Aizawl district magistrate Lalhriatpuia chuan thupek chuahin, tluang taka conference hman a nih theih nan BNSS Section 163(1) tlawhchhanin Dak Inpui, Treasury Square, Legislative Assembly building hnaih leh a chhehvel bakah, Tennis Court aṭanga Treasury Bazar inkarah mi panga aia tam punkhawm leh bengchhen khap a nih thu a puang. Thlai zuar leh hawker-te chu inpho chhuak lo tura hriattir an ni bawk.