LADC MDC thlanah MNF an chak

December 4, 2020-a Lai Autono­mous District Council (LADC)-a MDC inthlanpuia vote tlate chu nimin khan chhiar a ni a; seat 20 latu MNF party chu sorkarna siam thei turin an chak.

LADC-ah hian MDC seat 25 a awm a; MNF-in seat 20 an lak bakah, BJP-in leh Congress party-te'n seat pakhat ve ve an la a, independent candidate zinga pathum an tling bawk. Independent-a thlan tlin zinga mi Lorrain Lalpekliana Chinzah chu Congress party thláwptu a ni.

MDC atana thlan tlin zingah hian mi 12 chu an tlin vawi khatna a ni a, mi 10 chu MDC ni lai niin, mi pathum chu tun hmaa MDC lo ni tawh ṭhin an ni. Congress aṭanga BJP zawma BJP kaihhruai sorkar dintu zingah chief executive member ni lai T Zakunga chiah a tling.

LADC inthlanah hian MNF-in candidate 25, BJP-in candidate 17 leh INC-in candidate 14 an nei a; independent candidate 18 awmin, chu'ng zinga pathum chu INC thláwptu an ni.