World Tourism Day hman a ni: Best Tourism Village 2024 - Sialsuk

Nimin kha World Tourism Day vawi 44-na a ni a, Tourism minister Lalrinpuii hoin Tourist Lodge, Chaltlangah hman niin, Best Tourism Village 2024 atana Sialsuk khua thlan a ni.

World Tourism Day-ah hian tourist officer C Ramsangzuali kaihhruaiin kal khawmte'n Responsible Travel Pledge an sawi rual a; Tourism deputy director R Lalrinchhani kaihhruaiin Tourism Excellence Award sem a ni.

Lalrinpuii chuan, kumina World Tourism Day thupui 'Tourism and Peace' chu Mizoram mawina leh muanna nen inhmeh a tih thu sawiin, "Ram ralmuangah hmasawnna ṭha tak kan hmu ṭhin a, kan ram pawh khualzinte hîp turin nasa zawka kan ṭhan theih ka beisei. Kan hnam ziaráng, kan nunphung leh kan hnam chìn ṭhante zahpui loa uar taka khawvel hmuha kan phochhuah a ngai," a ti.

MLA-te chu an bialah khualzinte hîp nan homestay kalpui uar tura chahin Minister chuan, "Kan ram ngeiah para-gliding pilot ṭhahnem tak leh naupang kum 11 lek pilot qualified kan nei thei hi a lawmawm a, khualzinte hîp nan paragliding lam tihhmasawn tumin Tourism department chuan hma a la mek," a ti a; khualzinte chu thliar hrang loa sum hnâr an ni thei tih hriaa hawihhâwm taka dawngsawng ṭhin turin mipui a chah.

Tourism Minister chuan, SASCI hnuaia tourism ruhrel siamna kawngah hmalak mek zel a nih thu a sawi a, "Tourism infrastructure lamah sang rih lo mah ila, marketing lamah ṭan kan lak chuan tun aia nasain khualzinte kan hîp thei dawn a ni," a ti bawk.

World Tourism Day hmannaah hian Champhai North bialtu MLA H Ginzalala, East Tuipui bialtu MLA Ramthanmawia, South Tuipui bialtu MLA Jeje Lalpekhlua, Lunglei South bialtu MLA Lalramliana Papuia, Thorang bialtu MLA R Rohmingliana leh West Tuipui bialtu MLA Prova Chakma te pawhin thu an sawi a, an bial chhunga adopt tourism village an thlante leh thlan chhante an tarlang.