Central hnuaia hnate bawh turin Chief Minister-in ṭhalaite a chah

Chief minister Lalduhoma chuan nimin khan Serchhip Teachers' Association (STA)-te'n Serchhip Auditorium-a General Assembly leh an golden jubilee lawm khârna an buatsaih a hmanpui a; sorkar laipui hnuaia hna hrang hrangte Mizo ṭhalaite'n an bawh a ṭul thu a sawi.

Lalduhoma chuan, sorkar hna ruak aiin lehkhathiam an pung chak tih sawiin, "Sorkar hnaa luh a harsa tawh. Mizoram sorkarah hna ruak tlem mah se, India sorkarah chuan luh theihna a la tam reng. Kan thiamnain a tlin phawt chuan SSC te, Railway Recruitment Board te, IBPS lamahte hna a la tam hle. Rêl kawng rawn tlang tawhin an service ṭan ṭêp tawh a, kan rel station enkawltu tur Mizo ṭhalaite Railways officer leh staff tam tak kan mamawh dawn," a ti.

Mizo ṭhalaite bank leh central kaihhnawih hna hrang hranga an tling hlei thei lo chu a vei thu sawiin CM chuan, "Kan harsatna tawh mekte hi zirtirtute'n chonaa ngaiin, ṭhalai ṭha zawk, taima zawk leh tumruh zawk min chher chhuahsak tum ang che u. Heng exam-a tling tawhte hian kan zirna system leh syllabus-te an dem ngai lo. Tih tak takna nena beitu an tlem lutuk hi an mang tiangtu zawk a ni," a ti a; Mizo ṭhalaite tan theihtawp chhuah turin zirtirtute a chah.

Lalduhoma chuan, Serchhip district chu India rama ziak leh chhiar thiam tamna ber district a nih theih chhan chu zirtirtute thawhrimna vang a nih thu a sawi a, "Zirtirtu hna hi hna zahawm, Pathian rawngbawlna hna leh mi dangte ṭanpuina hmun ṭha a ni a, kan ram hian hma lam kan pan zel theih nan ṭhangthar ṭha zawk kan din a ngai a, zirtirna ṭha pek a ngai," a ti.

Chief Minister chuan, Handholding Scheme hnuaiah mahnia eizawnna tur din lama theihna neite tan hmalakna tur a awm dawn thu te, infiamna lama theihna nei ṭhate dap chhuah leh chu'ng mite chu ṭanpui zui zel a ṭul thute a sawi bawk.

CM Lalduhoma hian MLA Trophy (Inter School Challenge)-a ti ṭhate zirlaite hnenah lawmman a sem a ni.