Mizoramah thla 5 chhungin benga harsatna nei 21,683 hmu chhuak

National Programme for Prevention and Control of Deafness (NPPCD) chuan World Day of the Deaf - September 29 pualin nimin khan Hospital & Medical Education conference hall-ah inkhawm an buatsaih. Financial year 2024-25 kal mekah thla 5 chhungin Mizoramah benga harsatna nei mi 21,683 hmuh chhuah a nih thu tarlang a ni.

Beng hriatnaa harsatna tâwkte ni, World Day of the Deaf puala hun hmanah hian Health minister Lalrinpuii khuallian a ni a, Health secretary Sangchhin Chinzah-in a kaihruai.

Health Minister chuan, ri hriatnaa harsatna neite dinhmun hriatthiampui a ngaih thu a sawi a, "Beng hriatna chak lo leh bengngawng kan en danah rilru puthmang kan thlak a ṭul a, anmahni chhawm-dawl turin theihtawp i chhuah zel ang u,” a ti.

Civil Hospital, Aizawla beng lam thiam bik Dr Zonunsangi'n kumina World Day of the Deaf thupui, 'Sign up for sign languages right' tih a sawifiah a; beng ṭha lo mi 36 hnenah bengdár a thlawna sem a ni a, Deen Dayal Sravana Foundation, Andhra Pradesh leh Coal India Ltd., Kolkata ten an tumsak a ni.

Dr Zonunsangi tarlan danin, sorkar sum kummkal mek 2024-25 chhunga April-August, 2024 chhungin mi 73,573 endik zingah benga harsatna nei mi 21,683 hmuh chhuah a ni a, ri hriatna ṭha lo zual mi 5,444 an awm. Bengdar vuah ngai mi 2,462 hmuh chhuah a ni a, mi 159-te beng zai a ni tawh.

Khawvelah bengngawng mi vbc 46.6 vel an awm a, India ramah mi nuai 630 vel an awm. August 2006 aṭangin India ramah NPPCD kalpui a ni a, Mizoramah chuan August 2014-ah kalpui ṭan a ni.

World Day of the Deaf hmannaah hian Ephatha Special School leh Redeem Garden-a naupangte an tel a ni.