Kuhva tawlhrûk tihtawp tumin sorkarin theihtawp a chhuah - HM

Minister K Sapdanga chu nimin khan Champhai DC Conference Hall-ah Champhaia sorkar department/office hrang hranga hotu (head of office)-te leh YMA Sub Headquarters, Champhai hruaitute'n an inkâwm a; kuhva tawlhrûk tihtawp tumin sorkarin theihtawp a chhuah zel thu a sawi.

K Sapdanga chuan, dan loa kuhva chu an sorkar tirh aṭangin an buaipui nasa tih sawiin, "Kuhva chungchangah theihtawp kan chhuah zel a, hmasawnna pawh kan hmu zel. Kuhva kaihhnawiha sum che vel hian kan rilru a hruai kawi nasa hlein a lang a, kuhva chínga ei zawngte'n harsatna an tawh phah hial. Awlsam taka sum hmuh duhna thinlung hi kan kalsan a ngai," a ti.

Champhai chu hun eng emaw chen kal ta aṭangin a ṭha lo zawngin a langsar ṭhin tih sawiin Sapdanga chuan, "A siamṭhat hna kan thawh vat a ngai. Tunlaia kan ramin a buaipui ber chu ruihhlo a ni a, hei hi thapui thawha kan do tlan a ngai. Police kuta dah vek chi a ni lo a, anni hian ruihhlo ringawt an buaipui thei lo a, kan zavaia theihtawp kan chhuah a ngai a ni," a ti a; ruihhlo avangin ṭhalaite an thih tam tawh thu a sawi.

K Sapdanga chuan, sorkar hna chu eizawnna atan chauh ni lo, vantlang rawngbawlnaa ngaih tur a nih thu sawiin, "A hautak lo zawng, a thawk chhuak tam zawnga hna thawh tum ṭheuh ila, kan tu leh kan fate seilenna tlaka Mizoram chhuah theitu in ni tih hre ang che u,” tiin a chah.

Home Minister chuan, Champhai district chu district pawimawh a ni tih sawiin, "Ramria awm a nih mai bakah, ei leh barah pawh Mizoram innghahna tlak ni thei turin a ram leiung a ṭha a, chumi hai chhuak tur chuan sorkar pawhin ngaihtuahna a sêng nasa a ni," a ti.

ZPM chu la sorkar ngai lo an nih thu sawiin K Sapdanga chuan, "Kawng ṭhenkhatah duhthu kan la sâm lo hle tih pawh kan hria. Sorkar hnathawkte hi kan kut leh ke an ni lo thei lo," a ti a; sorkarna siamtute'n duh dan leh policy an nei ṭhin tih sawiin, tuna sorkar policy-te a hlawhtlin theih nan theihtawp chhuaha thawhpuiah kal khawmte a sáwm.

Inkawmhonaah hian khaw-tlangin harsatna leh mamawh an neih te, sorkar department hrang hrangte hmalakna leh hma-chhawpte ngaihthlaka sawiho a ni a; harsatna chingfel tura ṭan lak dan turte ngaihtuahho a ni.