KHAWTHLIR

Thing chhiarpui

Centre for Environment and Social Justice (CESJ), Mizoram member-te chuan nimin khan Aizawla Assam Rifles ram chhungah thing awm zat an chhiar. CESJ hian Assam Rifles hotute'n an remtih angin thing chhiarpui an nei a, "AR ram luah chhunga thing chhiar beihpui thlâk turin Urban Forestry lama mithiamte ruaiin hma kan la ṭan a ni," an ti.

MISSTA khawmpui

Mizoram Secondary School Teachers Association (MISSTA) chuan nimin khan Synod Conference Centre-ah General Conference vawi 24-na an hmang. Inkhawmpui hi MISSTA vice president Lalnuntluanga Sailo-in a kaihruai a, president C Lalremruata'n thu a sawi. An member pension mi 62-te thlahna leh member thi mi paruk sûnna hun an hmang a, chawhnuah ro an rel. MISSTA-ah hian member 766 an awm mek a ni.

DTO Site Office

Transport department chuan Cyclone Remal-in chhiatna a thlen vanga Hlimena Aizawl DTO Site Office khâr lailawk chu October 1, 2024 aṭangin hawn leh tawh tur a nih thu a tarlang a; driving test leh lirthei fitness ti turte tan dan pangngai angin DTO Site Office-ah hian tih leh theih a ni tawh dawn.

Khapna thupek

Serchhip bawrhsap Paul L Khuma chuan BNSS Section 163 tlawhchhanin Serchhip district-ah dan loa kuhva lak luh leh phurh khapna thupek a tichhuak. Hâlpuah, halmawi, meithallawn (sky lantern) leh puak thei thil dang bakah, silai lem a mu hmang chi lak luh, zawrh, hralh, hâl leh hman khap a nih thu a puang bawk.

Heroin leh zu man

Serchhipa Excise and Narcotics department mi leh sate chuan September 25, Nilaini khan Serchhip P&E Vengah heroin gram 65.52 leh a neitua puh Lalengmawia (46) s/o Roluahpuia an man. Nilaini vek khan Evi Lalramhluni (33) d/o Vanlalauva, Thenzawl Venghlun hnen aṭangin Royal Stag whiskey ûm 36, Kingfisher beer bûr 192 leh Simba beer bûr 24 an man bawk.

EFCC review

Environment, Forest & Climate Change minister Lalthansanga kaihhruaiin nimin khan Wildlife Warden's conference hall-ah EFCC department hnathawhte thlir letna, Mid-term Review of EFCC neih a ni. Minister chuan, "Department hmalakna apiangah a tam thei ang ber mipui an tel vena tur ruahmanna siam ṭhin ang che u," a ti a, sorkar kut leh ke an nih angin sorkar hmalakna a kal dik theih nan theihtawp chhuahpui zel turin a sáwm.

Bawlhhlawh tifai

Urban Development & Poverty Alleviation department leh YMA, Theiriat Branch-te chuan nimin khan Theiriat huam chhunga kawngpui kam hnim sâm fai leh bawlhhlawh thenfai hnatlang an huaihawt a, mi 60 vel an thawk chhuak. Theiriat hi Swachhata Hi Seva 2024 kalpui chhunga Lunglei khawpui huam chhunga vantlang hmunhma then fai ngai bik ruahman pariat zinga pakhat a ni.

Fest leh Exhibition

Urban Development & Poverty Alleviation department bultumin September 25, Nilaini khan Siahaah Cleanliness Week hawnna leh Swachh Bharat Cultural Fest & Waste to Art Exhibition buatsaih a ni a, MADC-a executive member K Chhuabei-in a hmanpui. Faina chungchang mipui zirtirnaa hma hruaitu tur, Siaha District Swatchh Bharat ambassador atan Lucy Siakhel (social media influencer), John Beizachhi Phuto (senior artist) leh Rody H Vanlalhriatpuii (Miss Mizoram 2017)-te ruat an ni.

EFCC review

Environment, Forest & Climate Change minister Lalthansanga kaihhruaiin nimin khan Wildlife Warden's conference hall-ah EFCC department hnathawhte thlir letna, Mid-term Review of EFCC neih a ni. Minister chuan, "Department hmalakna apiangah a tam thei ang ber mipui an tel vena tur ruahmanna siam ṭhin ang che u," a ti a, sorkar kut leh ke an nih angin sorkar hmalakna a kal dik theih nan theihtawp chhuahpui zel turin a sáwm.

Badge dum belh tum ṭhulh

NHM Employees Union, Mizoram (NEUM) chuan thuchhuah siamin, sorkar laka lungawi loh lantirna atana September 26-28, 2024 chhunga an hnathawhnaa badge dum bel an tum chu an ṭhulh tih an tarlang. NEUM chuan, NEUM office bearer-te leh Health Secretary leh department official-te nen an inbiaknaah, department hotunu berin an thil phûtte chu hmalakna kal lai mek a nih thu leh theihtawp chhuahpui an intiam avangin badge dum bel an tum chu an ṭhulh tih an tarlang a, "Kan hotute hmalakna hi ngaihchan rih ṭha kan ti a, kan beisei anga hmalak a nih loh chuan kal zel dan tur kan rel ang," an ti.