Ṭha nia kan hriatah huaisen takin kan kal zel dawn - Education Minister

Education minister Dr Vanlalthlana chuan, zirna siamṭhatna turin ṭha nia an hriatah chuan huaisen taka an kal zel dawn thu leh thurawn pek zel theih an nih thu a sawi.

Dr Vanlalthlana hian nimin khan Education Complex, MacDonald Hill-a Education consultant Rev. Dr K Thanzauva pisa a hawnnaah thu sawiin, mi harsa zawkte dâwm kanna atan zirna siamṭhat chu a bulpui a nih thu a sawi a, "Zirna siamṭhatna kawngah ṭha nia kan hriatah chuan huaisen takin kan kal zel dawn a, dawihzepa pên ngam loh kan tum lo. Kan tisual palh a nih pawhin kan insiamṭha zel dawn a, ṭha nia kan hriatah chuan kan kal zel dawn," a ti.

Thurâwn an mamawh thu sawiin Vanlalthlana chuan, "Kan kal zelna turah thurâwn kan mamawh. Thurâwn hi kan ngaisang a, a theih chuan ziakin ni se. Mizoram hi kan tu leh fate tana luah tlaka kan siam a ngai a, i ṭangho zel ang u," a ti a, ṭanhopuiah kal khawmte leh mipui a sáwm.

Education Consultant chungchangah Education Minister chuan, "Department lian tak enfel ngai apiang enfel a, rawtnate siamtu tur consultant Rev. Dr K Thanzauva a awm ta chu a lawmawm. Consultant hi mi chak, zirna lama tawnhriat nei ṭha leh tui tak a ni," a ti.

Education Consultant pisa hawnna inkhawm hi School Education director Lalsangliana'n a kaihruai a; minister of state F Rodingliana leh consultant Rev. Dr K Thanzauva te pawhin thu an sawi. MLA Lalchhuanthanga leh ZPM president Lalliansawta ten an hmanpui bawk.