Thisen peka thu dik lo thehdarh pawi ti

Association for Voluntary Blood Donation (AVBD), Mizoram chuan, tun hnaia Pachhunga University College-in blood donation camp an neiha thisen an pek zinga 60% chu HIV positive a nih thu thehdarh chu thu dik lo hulhual a nih thu leh thu dik lo thehdarh a ni chu pawi an tih thu an tarlang.

AVBD chuan nimin khan thuchhuah siamin, thisen pek reng reng chu a thianghlim leh thianghlim loh endik vek ṭhin a ni a, HIV mai bakah, natna dang lakah a fihlim leh fihlim loh endik vek a nih thu an tarlang a, "PUC zirlaite thisen pek pawh endik vek a ni a, HIV positive tam tak an awm anga sawi hi thu dik lo a ni tih finfiah a ni," an ti.

PUC zirlaite'n thisen an pek chungchanga thu dik lo thehdarh a ni chu pawi an tih thu sawiin AVBD chuan, "Tun hnuah chuan thisen pek chungchangah tlawmngaia thisen petute tihnual thei thu dik lo thehdarh tawh lo turin mi tin kan ngen a ni," an ti a, ṭhahnemngai taka thisen pe zel turin Mizo ṭhalaite an ngen.

AVBD chuan, thisen pek endik tawhah hian HIV positive rinhlelhawm tlemtê a awm tawh a, thisen pek percentage aṭanga chhût phei chuan a hniam hle tih an tarlang a, "Miin thisen an pekte endiknaah HIV positive rinhlelhawm a awm a nih pawhin a hre tur takte bakin an hre ngai lo a, mipui vantlang tan hriat theih a ni lo. Mipui vantlang hriat tura puanzar hi dan kalh a ni bawk," an ti.