Aizawl Bawrhsap Pisapui kum 125-na lawm
Aizawl DC office chuan nimin khan Aizawl Bawrsap Pisapui kum 125-na an lawm. Aizawl Bawrhsap Pisapui kum 125 tlin puala hriatrengna lung phek an siam chu pisa gate bulah DC Dr Franklin Laltinkhuma'n a hawng a; DC bangla, Tuikhuahtlangah a lawmna inkhawm neih a ni.
DC bangla-a lawmna inkhawmah hian Aizawl DC lo ni tawh la damte an tel a, thu sawina hun pek vek an ni.
Tuna DC office-a thawk mekte bakah, tun hmaa lo thawk tawh pawh mi ṭhahnem tak an tel. Aizawl Bawrhsap pisa kum 125-na lawm hian tlaiah ruai an ṭheh.
Aizawl DC Office aṭanga thu dawn danin, The Chin-Lushai Expedition 1888-1889 hming vuahin Surma Valley Military Police battalion-a mi 400-te chu WW Daly-a hoin February 2, 1890-ah Aizawlah an thleng a; tuna Assam Rifles awmnaah an inbéngbel a ni.
Assam chief commissioner-in WW Daly-a chu Mizorama civil administration nghet din turin a hriattir. April 22, 1890-ah North Lushai Hills political officer (bawrhsap) atan Capt. HR Browne chu ruat a ni a, ani hian a hna thar chu a zawm nghal a; April 22, 1890 chu Aizawl Bawrhsap Pisapui din ṭan ni-ah ngaih a ni ta a ni.
A tirah chuan bawrhsap pisa chu thing leh mau hmanga sak a ni a, chutiang chu kum 1900 thleng an hmang. Kum 1900-ah chuan tun thlenga la awm, Treasury Strong Room hi lung hmanga sak a ni a, chumi hnuah tuna Aizawl DC office atana hman mek, Bawrhsap Pisapui pawh lung hmang bawka sak niin, kum 1905-ah sak zawha luah nghal a ni.
Aizawl bawrhsap chu a tirah political officer tih a ni a, political officer pasarih an awm. Hetih lai hian Mizoram hmar lam chu North Lushai Hills tih niin, Assam hnuaiah a awm a; chhim lam, South Lushai Hills chu Bengal (tuna Bangladesh) hnuaiah a awm thung. Kum 1898 aṭanga 1952 thleng chhim leh hmara ṭhen loin Lushai Hills tih a ni a; bawrhsapte chu superintendent tih an ni.
Mizoram pum chu kum 1952-54 chhungin Lushai Hills Autonomous District tih a ni a, chumi chhunga bawrhsapte pawh deputy commissioner (DC) tih an ni.
1952-54 chhung hian DC pathum an awm a, hnam dang vek an ni. Mizoram chu lal bân a nih kum, September 1954 aṭangin Mizo District tih a ni a, bawrhsapte pawh DC tih an ni ta zel a; Mizo district-a DC hmasa ber chu KGR Iyer a ni.
Kum 1972-a Mizoram UT a nih te, kum 1986-a state a nih hnuah pawh bawrhsapte chu DC tih an ni ta zel a; UT hnuah erawh chuan Mizoram pum ni loin, Aizawl district chauh a huam tawh thung.