Khawthlir

Graduation day
Synod Missionary Training Centre chuan nimin khan Synod Conference Centre-ah Graduation Day an hmang a, Synod moderator Rev. Lalrinmawia leh senior executive secretary Rev. Lalzuithanga ten an hmanpui. Kumin hi Missionary Trainning Centre-in Graduation Day an hman vawi thumna a ni a; zirlai 14-te an pass vek a, PC Lallawmawmi, Saitual North chu Best Student-ah thlan a ni.

H/S khâr
Mizo Students' Union (MSU) sub-headquarters, Khawlailung chuan Khawlailung High School chu headmaster dah phûtin nimin aṭang khan tiam chin awm loin an khâr. Khawlailung MSU-te chuan, an khaw high school-ah hian kum 2007 aṭanga tun thlengin headmaster an la nei lo niin an tarlang.

Duhsakna hlan
MHIP general headquarters chuan thuchhuah siamin, village council leh local council inthlan tura hmeichhia candidate-te chu duhsakna an hlan. Hmeichhe candidate zinga MHIP-a nihna neite chu an nihna bansan leh bansan loh thuah an mimal thutlukna tur a nih thu an sawi.

AMC dawr theih loh
Aizawl Municipal Council Employees Association chuan, vawiin leh naktuk hian AMC-a thawkte intuaitharna hun an hmang dawn a, AMC dawr theih a ni dawn lo tih an tarlang.

Candidate tamna
April 30, 2015-a village council inthlan turah hriat theih chinah Tlabung Zodin Vengah candidate an tam ber a; V/C member pasarih atan candidate 24 an awm. Heng zinga pakua chu independent-a ding an ni.

ATC Valedictory
Aizawl Theological College chuan April 21, 2015 khan ATC Chapel-ah Valedictory Service 2015 an hmang a; Synod moderator Rev. Lalrinmawia leh Synod puipate'n an hmanpui.

Lehkhabu tlangzarh
SL Thansanga lehkhabu ziah, 'Aw Zoram sim rawh' tih chu nimin khan Mizoram Bar Association office-ah Bar Association president LH Lianhrima'n a tlangzarh. Lehkhabu hi Rs. 150 man a ni.