H/S headmaster post hnawhkhah tum mek

School Education director K Lalthawmmawia chuan, high school headmaster post ruak hnawhkhah nan Finance department leh DP&AR aṭangin phalna an hmu tawh tih a sawi.

Vanglaini palai zawhna chhangin, K Lalthawmmawia chuan, H/S headmaster post ruak 49 a awm a, chungte chu hnawhkhah tum a nih thu a sawi a, "Hnawhkhahna turin MPSC-ah lehkha thehluh a ni tawh," a ti.

School Education director sawi danin, H/S headmaster post ruak hnawhkhat turin headmaster hna chelh thei tawhte kum nga chhunga an ACR khawnkhawm vek a ni a; chungte chu MPSC-in an endik hunah recommendation an siam ang a, mi 49 an thlang dawn a ni.

K Lalthawmmawia chuan, dan ang taka mumal taka tih a ngaih avangin tun dinhmunah sikul mal tan bik headmaster pek ngawt theih a ni lo tih sawiin, "Sikul dang tihbuai a ngaih ṭhin avangin, sikul mal pakhat nawr vanga headmaster inpek theih a ni lo," a ti a; headmaster nei lote chu dawhtheih taka MPSC-in an tihfel hun nghak turin a ngen.