MUP president tharah RK Thanga thlang
Mizoram Upa Pawl (MUP) chuan Thawhlehni aṭang khan Vanapa Hall-ah General Assembly an hmang a; nimin khan hruaitu thar thlanna leh rorel inkhawm an nei a, president-ah RK Thanga, Mission Veng an thlang.
Rorel inkhawm hi MUP president ṭanglai K Malsawma'n a kaihruai a; agenda eng emaw zat lut zingah, "MUP logo hi tidanglamin, pawl thil tum pawh pakhat 'Mizo ṭawng vawnhim leh a hman dan dik ṭhangtharte zirtir' tih belh ni rawh se," tih an pawm. Agenda dang zawng chu MUP Executive Committee ngaihtuah tura dah a ni.
MUP hian MJA kaihhruaina hnuaiah kum 2015-17 chhunga hruaitu tur an thlang a, president-ah RK Thanga, Mission Veng; vice president-ah Lalhuapzauva, Bungkawn leh treasurer-ah PC Lalmawia, Venghlui-te an thlang.
Tun dinhmunah MUP gen.hqrs. hnuaiah sub-headquarters paruk, area 80, unit 570 a awm a, member zawng zawng chu mi 60,000 an ni. Nikum khan MUP member 1,597 an thi a, chung zinga 10 chu kum 100 chunglam niin, thite zinga upa ber chu Vanlala (107), ITI Veng a ni.
MUP conference agenda Ṭhenkhat
• Old Age Pension tihsan a nih theihna atana hmalak
• Mithi pangpar leh puan inpek uar lutuk aia pawisa inpek uar zawk tura hmalak
• Mizo culture (zai leh lâm) hi sikul zirlai bu subject pakhatah dah ve ni rawh se
• Ramngaw leh nungcha humhalh nasa leh zuala inzirtir a, dan bawhchhetute a na thei ang bera hrem an nih theihna atan hmalak ni rawh se
• Sorkarin NLUP a sem hi mi tam takin an hlawhtlinpui theihna atan chak zawkin sorkarin hma la rawh se
• Rerferal Hospital-a doctor duty-te hian Aizawl aṭanga thawk loin, a hmun ngeiah awmchilh rawh se