MBSE-in zirlaibu dik lo tidik turin hrilh

23rd April, 2015

Mizoram Board of School Education (MBSE) hotute chuan, middle school-a general knowledge zirlaibu, Fact Finder chu a thlawna tidik vek turin a chhutute an hriattir thu an sawi.

Vanglaini palai zawhna chhangin MBSE hotute chuan, "Fact Finder-a dik lo hi MZP hâl hma khan kan hre tawh. Kan lehkhabu chhuah reng rengah hian dik lo a awm a nih chuan min hriattir tura ngenna kan dah tel ṭhin. MZP-te khan engmah chiang faka min hrilh loin an hâl a ni. Hâl a nih hma khan dik lo a awm tih kan hriat avangin tihdik a nih theihna atan hma kan la nghal a ni," an ti.

MBSE hotute sawi danin, Fact Finder chu a chhutute hnenah a thlawna chhu ṭha leh tura hriattir a ni a, an tihdikna soft copy pawh MBSE-ah an thawn let tawh. MBSE chuan lehkhabu lei tawhte chu a thlawna pek an duh a, mahse an tih theih dawn leh dawn loh a la chiang lo.

Fact Finder hâl tak chu kum 2010 edition a ni tih sawiin, MBSE hotute chuan, "Kum eng emaw zat hman a lo ni tawh a, zirtirtu lam

aṭang pawhin sawiselna kan dawng miah lo. Dik lo a awm tih kan hriat veleh siamṭha turin theihtawp kan chhuah nghal char char a ni. A dik lo lai hriat vek a nih avangin a duh tan chuan hman char char theih tho a ni a, zirlaite a dika hrilh theih mai a ni. Kum 2010-a chhut a nih tawh avangin, thil tam tak a update lo deuh," a ti.

MBSE hotute chuan, kum 2012 aṭangin SCERT hnenah academic authority pek a ni tawh tih sawiin, "SCERT lamin kumin atan chuan middle school zir tur hi lo buaipui leh mai tura min tih avangin, kan lehkhabu neih sa siamṭhat ngai a awm leh awm loh endik turin kan thawn a ni," an ti a; Fact Finder-ah tihdik ngai SCERT lam aṭanga an dawn loh thu an sawi.

Fact Finder chu main subject a nih loh thu sawiin MBSE hotute chuan, "Zirtirtu lam ngenna vanga tihbelh a ni a, grade mark atan chauh hman a ni. Hetiang a nih avang hian en uluk a hlawh lo deuh pawh a ni mai thei," an ti.

MBSE hotute chuan eng zirlaibu pawh ni se dik taka buatsaih chu tu pawhin an duh dan ber a nih thu sawiin, "A chhutu lam hian engtin nge khawpui hming dik lo lutuka an rawn tih kan hre bik lo," an ti a; MBSE chu academic authority ni tawh lo mah se, zirlaibu dik loh chhanah an mawhphurhna a tel tih an pawm thu an sawi.