Thlai chi supply vanga hmingchhiatna Thleng tawh lo se: Agriculture Minister
Agriculture minister R Lalzirliana chuan, tun hmaa thlai chi supply vanga Agriculture department hmingchhiatna thleng ṭhin ang chu thleng nawn tawh lo se a duh thu sawiin, "Kuthnathawktute hnenah thlai chi kan sem a nih chuan a ṭha ber a ni tur a ni," a ti.
Agriculture department chuan nimin khan an directorate conference hall-ah Quarterly-cum-Annual Review Meeting an hmang a, Agriculture secretary Lalhmingthanga'n a kaihruai. Agriculture minister R Lalzirliana leh parliamentary secretary Lt.Col. ZS Zuala ten sawm an nih angin an hmanpui a ni.
Agriculture minister chuan, tun hmaa loneitute sum tur chingpen a awm ṭhin ang chu a awm tawh loa a hriat thu leh officer-te'n kut hnathawktute an fuih phûr ṭhaa a hriat thu a sawi a, "Mipuite hi an thatchhe ngawt lo, an hlâwkna tur leh an tana ṭhaah chuan nilêngin nisa hnuaiah leh thosi karah an thawk peih a ni," a ti.
R Lalzirliana chuan, hna dil ṭhin, an hmuh veleha hralh leh ṭhinte chu an huatthlala hle tih a sawi rualin, Agriculture department-ah chuan hmel thar an hmu mek a, sum hmuhte ṭangkai leh daihzai taka hman a ni mek niin a sawi a; bungrua leh khawl sem tawhte chu a dawngtute'n an hmang ṭangkai em tih en zui ṭhin ni se a duh thu a sawi bawk.
R Lalzirliana chuan, district-a Agriculture department officer-te hnathawh fakin, ṭhuthmuna thil ti mai loa a hmuna an kalchilh peih chu a lawmawm a tih thu a sawi a; district-a officer-te hnathawh enpui tura director a pên chhuak ṭhin chu lawmawm a tih thu a sawi a ni.
Thusawitu dang, parliamentary secretary (Agriculture) Col. ZS Zuala chuan sorkar chu langtlang taka kal a tum tih sawiin, "Department-te pawhin an sum hmuhte langtlang leh dik taka an hman a pawimawh a ni," a ti.
Col ZS Zuala chuan thlai chi sem reng reng a ṭhat loh chuan loneitute an beidawng ang tih a hlauhawm thu sawiin, "State danga loneitu intihlum ang chi a thlen loh nan thlai chi ṭha chauh sem a ṭul," a ti a, Agriculture officer-te chu hmun kilkhawr deuha an awm anih pawhin Zoram hmasawn nan bei zelin, a chhelai thawm ṭhatu ni turin a fuih.
Meeting-ah hian district agriculture officer (DAO) ten kum 2014-15 chhunga an hmalakna, hlawhtlinna leh harsatna an neihte a lem nen an sawifiah a ni.