MNYF-in voluntary blood donation tlakhniam chhanah sorkar an puh

MNF ṭhalaite chuan thuchhuah siamin, tlawm­ngai pawlte'n a thlawna thisen an pekte sum siam nana hmangah sorkar an puh a, chuvang chuan a thlawna thisen pek a tla­hniam niin an sawi.

MNYF chuan, a thlawn­a thisen pek tlahniam chu pawi an tih tak zet thu an sawi a, "Kum 2013-14 chhunga mimal leh tlawm­ngai pawlte aṭanga thisen hmuh zat chu unit 20,699 a nih laiin, 2014-15 chhungin unit 17,663 chauh a ni a, 2014-15 chhunga a thlawna thisen pek tlakhniamna hi unit 3,036 zet a tling," an ti.

Thisen sawngbawlna man lakin thisen pe ṭhinte a tihnuala an ngaih thu sawiin, MNYF chuan, thisen sawngbawlna man lak chu a rang lama sût turin sorkar an ngen a ni.

MNYF chuan, village council leh local council inthlan turah Congress party-te'n oppostition party candidate-te an vau nasa hle nia sawiin, Champhai North bialtu MLA pawhin a bial chhung veng ṭhenkhata MNF V/C candidate-te inhnûkdâwk turin a vau niin an sawi a, "Democracy zah lohna leh mimal zalenna rahbehna a ni," an ti a; Congress hruaitute chu mi vau tawh lo turin an chah a ni.