ZPM-in AMC sorkar an siam chuan ward comtt hna thawhtir an tum

ZPM vice president K Sapdanga chuan, Aizawl Municipal Corporation (AMC)-ah sorkarna an siam chuan ward committee-te dan ang taka hna an thawhtir dawn thu leh, ZPM-in Mizoramah sorkarna an siam hunah minister bathlàra thlawhhma neih tihbo an tum thu a sawi.

K Sapdanga hian nimin khan an pisaa mi thar lawm luhna inkhawmah thu sawiin, "AMC inthlan lo awm turah hian Pathian leh mipui zara ZPM-in sorkar a siam chuan, AMC lungphûm ward committee hi a taka tundin a, dan ang taka hna thawhtir kan tum. Kum 10 kalta chhung khan ward committee thuneihna leh mawhphurhna hi councillor-te berin an chhuhsak a, anmahni thuneihna an inpe chawp a, anmahni dan siam ngei an palzût ṭhin. ZPM chuan chu chu a remti lo ang," a ti.

Kum 2023 MLA inthlanah ZPM-in sorkarna an siam chuan minister bathlârah thlawhhma neih an phal dawn lo tih sawiin Sapdanga chuan, "Minister-te bathlara thlawhhma neih a, khabe hmanga eizawn kalphung hi tihbo kan tum dawn. Thawkrimte erawhin an thawhrim rah phû tâwk hlâwkna an tèl ngei ang tih kan tiam a ni," a ti a; chhungkaw tinte'n an tuchhuan thlenga eizawnna ngêlnghet an neih theihna turin sorkar chakna hman a nih tur thu a sawi.

ZPM Vice President chuan, eptu an nih lai pawhin kalphung thar an hman thu sawiin, "Kan thlan tlin kan MLA-te'n development fund an hmang ṭha a, Mizoram pumah MLA fund hmanga hmasawnna hmél mipuiin an hmuhte chu ZPM MLA-te thawh deuh vek a ni tih hretu chu Mizoram mipui kan ni. Party dang, MLA ngah tak takte hi an bialah MLA fund-te mipui tana ṭangkai zawnga hmang ve turin kan phût. A theih tih kan MLA-te aṭangin kan hre chiang a ni," a ti.

Thlai thar lei a hlawhtling thei tih Covid-19 avangin Mizoram mipuiin an hriat chian thu sawiin K Sapdanga chuan, "ZPM a sorkar hunah chuan, kut hnathawktute'n an thawhrim rah phû tâwk hlâwkna an têl theihna turin khawpui lian deuh deuhah vegitable supply chain centre kan siam ngei ang," a ti a; chumi hnuaiah chuan thlai thartute'n hlâwk zawkin an hralh ang a, a leitute'n to uchuak loin an lei theih tur thu a sawi.

ZPM thuchhuah tarlan danin, nimin khan mi 80 ZPM-ah an lâwm lut a ni.