Chhawrzui phutin CMO kawtah pungkhawm CM-in chhawr zui theih an ni lo tih a hrilh

RMSA hnuaia laboratorty assistant leh office clerk-te chuan, an hna an thawh chhunzawm theih dawn tawh loh avangin nimin khan thawh chhunzawm tura ngen tumin Chief Minister's Office (CMO) kawtah an pungkhawm a; CM Lal Thanhawla chuan sum harsatna avangin chhawr chhunzawm theih an nih loh thu a hrilh.

RMSA hnathawkte hi CMO kawt aṭangin police-te'n an kal sawntir a, an hotute chu CM Lal Thanhawla a pisa-ah hmuhtir an ni. Chief Minister chuan, laboratory assistant leh clerk-te chu khawngaih pawh ni se, sum leh pai a awm loh avangin khawngaih theih an nih loh thu a lo hrilh tih RMSA hnathawkte chuan Vanglaini an hrilh.

RMSA hnathawkte hian CMO gate pawnah lungawi lohna lantirin tlai dar 3 thleng sitting demonstration an nei a, vawiinah pawh chhunzawm leh an tum.

Hetih lai hian, RMSA Laboratory Assistant & Office Clerk (RMSA LA&OC) JAC chuan Chief Minister hnenah RMSA Project Approval Board-in an approve theih tak loh thu an hrilh a, "Hei hi a chhan nia kan hriat chu, state ṭhenkhat PAB-in an approve tawh recruit lo an awm vang a ni. Mizoram chu hmarchhaka RMSA kalpui ṭha ber pawl kan ni. Ṭhahnemngai tak leh ṭha taka thawk nia kan inhriat laia bàn kan ni ta mai hi mak kan tiin, hrehawm kan ti hle a ni," an ti.

India ram pumah laboratory assistant leh office clerk-te chu bàn an ni thu sawiin RMSA LA&OC chuan, "State tam zawk chuan an state sorkar hnuaiah an thawk chhunzawm dawn niin kan hria. Kan state hi a retheiin sum lamah kan pachhia tih kan hria a, mahse, state tam zawkte'n an tih theih chu kan state sorkar hian a duh chuan an ti ve thei tih kan hria," an ti a; an bàn takte chu Congress sorkar hnuaia lâk an nih angin, Congress sorkarin an chhawr zui zel an beisei tlat thu an sawi.

RMSA LA&OC chuan, school building ṭha tak tak sak mek a ni tih sawiin, "Hetiang a nih laia thawktu pawimawh tak laboratory enkawltute leh office clerk-te bàn kan ni hi zirna hmasawnna nen inhmeh lo kan ti hle a ni," an ti.

RMSA LA&OC tarlan danin, Mizoram sorkar, RMSA leh Mizoram Rural Bank chuan April 2017 thleng awh turin memorandum of understanding (MoU) an ziak a, chuvang chuan RMSA-a thawk mi tam takin MRB-ah loan an la a, an rûl mek a ni.

RMSA LA&OC-te chuan, RMSA hnuaia thawk bàn takte chu mi 366 an nih thu sawiin, "Kum khata kan hlawh tur chu cheng nuai 662.89 a ni. Central sorkar chuan SSA-a state matching share a pek ṭhin 10% (vbc. 20.06) pek a ngai dawn ta lo a, midday meal atana state matching share (nuai 683.21) pek a ngai tawh dawn lo bawk a; kan hlawh tur hi chu sorkarin a neih ngei kan beisei tlat a ni," an ti.