Pánhnah Intodelh Programme buatsaih

West Lungdar-a kut hnathawktu intél khawm, Kaihlet Zau Society-te chuan nimin khan Kaihlet Zauah 'Panhnah Intodelh Programme' an buatsaih a, Agriculture minister C Lalrinsanga'n hmanpuiin, chhungkaw 12-te tana thlai châwmna tur tui dah khawlna (water tank) 12 siam zawh tawh a hawng nghal.

Agriculture Minister chuan, Mizo mipui sum luan ral tamna ber chu Mizorama thar ve theih, thar chhuah si loh, ni tin mamawh (essential commodity) leina a nih thu a sawi a, "Hei hi ngaihven leh zual a ngai a, kut hnathawktute pawhin kan state chhung mamawh zualpui phuhru thei tur tal chuan ṭan an lâk a ngai," a ti.

C Lalrinsanga chuan, pánhnah chu sum tam tak séngin phai aṭanga lak luh ṭhin a nih thu sawiin, "Panhnah kan mamawh aṭanga 99% vel hi phai aṭanga lak luh a ni mek. Kan ti ta sa sa a nih chuan West Lungdar khua hi Mizoramin panhnah avanga an hriat lâr ni thei turin ṭan an la thei a ni," a ti a; Kaihlet Zau panna kawng pawh kut hnathawktute ṭan laknain a nawr nasat viau chuan ṭha zawka siam a nih tur thu a sawi.

Kut hnathawktute vil turin Agriculture department hnuaia mithiamte pawh director aṭanga district level-a officer-te zawng zawng tiamin ṭan la zual turin an infuih ṭhin tih sawiin C Lalrinsanga chuan, "Agriculture mithiamte hi office-ah ṭhu mai lo a, kut hnathawktute thlawhhma a hmunah kal chilha tlawh a, an mamawhte zir chiang a, an hmasawn dan turte ngaihtuahpui turin kan innawr nasa mek a ni," a ti.

Kaihlet Zau hi West Lungdar khua aṭangin km. 3 vela hláah a awm a, chhungkaw 60 velin huan thlai leh thei chi hrang hrang - kuhva, balhla, serthlum, pánhnah leh a dangte chíngin hma an la mek. Kut hnathawktute chu Kaihlet Zau Society hnuaiah intél khawmin, sorkar puihna leh anmahni remhriatnate hmanga hma lain, an huan thlaite sumah an chantir ṭhin.

Kaihlet  Zau Society-in an chhinchiah dan chuan, an zauah hian chhungkaw 35-in pánhnah an ching mek a, an zinga pánhnah thar tam pawlin kum khatah Rs. 3,00,000 chuangte an la lut thei a ni.