Ṭhelrêt sâwngbàwlna kháwl sem

Land Resources, Soil and Water Conservation department chuan nimin khan Lungleia an pisa tualah Lunglei district-a Lungsen, Zawlpui, Bolia Veng, Bunghmun leh Marpara South khuaa ṭhelrêt chíngtute hnenah ṭhelrêt sâwngbàwlna kháwl leh hmanraw dang an hlan a; Lunglei HPC vice chairman Lawmawm Tochhawng, MLA-in a hmanpui.

Lawmawma Tochhawng chuan, Lunglei district aṭanga ṭhelrêt an thar chhuak ve dawn ta chu thil chhinchhiah tlak tak a nih thu sawiin, "A buaipuitu department-a thawkte leh rubber chíngtu kut hnathawktute thawhrimna vang a ni a, an chungah lawmthu ka sawi a ni," a ti a; khawl dawngtute  chu an hmanraw dawnte a nihna tur taka ṭangkai taka hmang turin a chah.

Ṭhelret sawngbawlna khawl leh hmanrua dawngtute chu chhungkaw 40 an ni a, khawl unit 11 pek chhuah a ni. MIRSAC data aṭanga a lan danin, Lunglei district-ah ṭhelrêt chìn theihna tur ram hectare nuai 1.6-a awm a, hectare 500 vela zauah chìn mek a ni.