Commonwealth Parliamentary Association khawmpui Mizoramah Lok Sabha Speaker hoin hman a ni
Commonwealth Parliamentary Association (CPA), India Region, Region Zone - III Annual Conference vawi 21-na chu nimin khan Lok Sabha speaker Om Birla, CPA India Regional chairman ni bawk kaihhruaiin Mizoram Legislative Assembly Session Hall-ah ṭan a ni. Lok Sabha Speaker nimin khan conference ṭan hmain Mizoram Legislative Assembly Library-ah lehkha pawimawhte vawn ṭhatna tur archive cell thar a hawng.
Om Birla chuan, hmarchhak bialin hmasawnna rahbi thar a rap chho mek chu lawmawm a tih thu a sawi a, "Nimin khan Aizawl ka lo luh dawnin rel kawng hna kal mek ka hmu a, min tihlim hle. State zawng zawngte hi rel kawnga thlun zawm vek a ṭul em em a ni. India rama investment rawn ti duh hi an tam a, hmarchhak bialah hian tourism-ah te, agriculture-ah te, art & culture lamahte investment nasa zawk kalpui theih niin ka ngai a, kan inkalpawhna kawngte hi han ṭha lehzual se chu'ng hmalaknate chu chak zawkin kan kalpui thei ngei ang," a ti.
Democarcy-ah chuan mipui thlan tlinte chu mipui aw an nih thu sawiin Om Birla chuan, "Mipui harsatna leh an beseite chu kan ngaihtuah zel tur a ni. House inrelbawlna pawh ṭha takin kan kalpui tur a ni a, inhnialna leh sawihona hrisel neihna hmunah i chantir tlat ang u. Democracy tichaktu chu ngaihdan hrang hrang hi a ni," a ti a, ngaihdan inang lote sawihona aṭangin dan ṭha leh policy ṭha a chhuah ṭhin thu a sawi.
Chief minister Lalduhoma chuan kalkhawmte chu nghet taka mipui rorelna (democracy) tungding zel tura legislative zahawmna vawnghim turin a sawm a, "Ram dan hi dan siamtuten rilru thianghlim, langtlang leh mipui ṭhatna tura an siam a ni tih an hriat phawt chuan ṭha taka zawm turin mipuite hi an inpeih mai ṭhin. Commonwealth Parliamentary Association hian kan tawnhriat inhrilh kawngah te, kan inzir zelna atante leh ngaihdan kan inhrilhtawnna kawngahte min ṭanpui nasa," a ti a, conference chu legislative ruhrel tichak zualtu leh inpawhna thûk zawk neih nan hmang turin kalkhawmte a sawm bawk.
Rajya Sabha deputy chairman Harivash Narayan Singh pawhin thu sawiin, Mizoram sorkarin ṭha taka a lo dawnsawn avangin Mizoram Chief Minister leh Speaker-te chungah lawmthu a sawi a. "CPA chu kum 100 aia upa tawh association ṭangkai, dan siamtuten kan tawn hriatte kan inhrilhtawnna leh ram bial (region) chhunga kan mamawh inṭawm thil pawimawh kan sawihona hmun a ni," a ti a, CPA Region Zone III huam chhung state-te India ram tana an pawimawhna leh ram economy tana thâ an thawh hlawk dante, hmalak zel dan turte a tarlang.
He hunah hian Nagaland Legislative Assembly speaker Sharingain Longkumer chuan inkhawmpui an neih chhan leh a thil tum a sawi a; Mizoram Legislative Assembly speaker Lalbiakzama'n palaite lawmna thu a sawi. Chawhnu lamah 'India - ASEAN hmathlir sumdawnna leh thawhhonaa hmarchhak ram te telh dan' (Inclusion of the Northeast Region in the India - ASEAN vision for Trade & Cooperation) tih thupui sawiho.
CPA India Region bik hian India rama legislature 31-te a thlung khawm a, India Region hi region zone paliah ṭhen niin, nimina conference-ah khan region zone-III hnuaia Assam, Arunachal Pradesh, Manipur, Meghalaya, Mizoram, Nagaland, Sikkim, Tripura state-a ram hruaitute an tel.