Ruihhlo do kawngah kan police-te kut kan phuarsak dawn lo - HM

Home minister K Sapdanga chuan nimin khan Dungtlang Police Station a tlawh a, ruihhlo do kawngah police-te kut phuar sak an nih dawn loh thu a sawi.

Home Minister chuan Mizoram hmun hrang hrangah police chhuanawm tak takten rim taka venhimna hna an thawh avangin thil ṭha lo hrang hrang ram leh khawtlanga thleng theite nasa takin pumpelh a nih thu sawiin, "Mipuite tan a thlamuanthlakin, Zoram mipui aiawhin kan police-te thawhrimnaah lawmthu ka sawi a ni," a ti.

Kan ramin a buaipui ber ruihhlo do kawngah kan police-ten nasa takin ṭan an la tih sawiin K Sapdanga chuan, "Tunhnaiah pawh ruihlo thahnem tak kan rama lut tur leh kan ram paltlang tur man a ni a, ruihhlo do kawngah hian kan police te kut kan phuar sak dawn lo," a ti a, police-te tihchak leh thuamchak an ngaihna kawngah sorkar chuan a thlahthlam dawn hauh lo tih a sawi.

Home Minister chuan kalphung thar mipui sorkar an din chho mek laiin sorkar thar beihna tur zawng reng renga hun leh ni hmang pawl an awm nia a lan thu sawiin, "Mipuite pawh thudik lo thang vel mai mai enghelh lo turin kan in chah duh a ni," a ti.

K Sapdanga chuan kuthnathawktute chawikan an buaipui leh thupui ber a nih thub sawiin, "Chumi tur chuan kuthnathawktuten tih tur kan nei ve a, chu chu thawhrimna leh rinawmna nena taima taka mahni kutkawih rah seng tura inbuatsaih hi a ni," a ti a, tun aṭanga rei loteah kuthnathawktute zarah ei leh barah pawh kan ziaawm chhoh zel turah an ngaih thu a sawi.