Tunlai titi tam ber chu kawng chhia - MPCC President

MPCC chuan nimin khan Congress Bhavan-ah chhung inkhawm an hmang a, thusawitu MPCC president Lal Thanzara chuan tunlaia titi tam ber chu kawng chhia a nih thu a sawi.

Lal Thanzara chuan, "Tunlaia kan titi tam ber, chanchinbu leh Youtube-ahte lang tam ber chu kan kawngpui chhiat chungchang hi a ni. Congress sorkar lai 2018 inthlan dawn hnaiah furpui kan tawng a, lo pawh March 15 hma khan a hal hleihtheih loh a ni. Chutiang karah chuan kawngpui siam a har khawp mai. Sairang leh Buichali inkarah lung nuai tamtak man bungraw phur lirtheiin a rap pil a ni. Khatih lai khan MNF khan min bei nasa em em a, kan kawngpuiahte buhte an phun a, min elsen nasa em em a nih kha," a ti.

MNF an lo sorkara, an hun laia furpui ang kha an tawng ve lo chungin an kawng chu a ṭha bik chuang reng reng lo tih sawiin MPCC President chuan, "Khatih lai khan ṭhenkhatten a elsen nan kawngpuiah sanghate an chhuah a nih kha. Tuna kan sorkar hrawn lai mek hian working season an tih, kum tir lamah kawng siamṭhat ngaihtuah loin, hmalakna chang an hre lo," a ti a, tunah phei chuan tuilet hnua kawng chhiat ber ṭum a thleng ta niin a sawi.

MPCC President chuan sorkarin kawngpui a khar hial ngai khawpin kawngpui a chhia tih sawiin, "Vai driver-ten min elsen a, min nuihzat mek a ni. Hnam dang, ring lo mi minister-in, 'hetiang khawpa kawng chhiate chu, sorkar hi court a khin tlak a ni' min ti a ni. Mizote hi thil a nihna tak ngaihtuah loa insawichhiat kan ching a, kawng chhiat chungchangah hi chuan party pathumte hian in elsen dan tawk kan thiam tawh ang chu maw," a ti.

Kan sorkar kal tawh Congress emaw, MNF emawten economic programme eng nge an kalpui tawh tihte hi kan zirchiang peih lo nia a hriat thu sawiin Lal Thanzara chuan, "NLUP-te kha sum semna mai mai a ni titen min sawichhiat sak. Keini kan sorkar lai khan rangva inchung nei ngai reng reng loten rangva inchung kan sem vangin an lo neih phah," a ti a, NLUP vangin tam takin huan puitling takin an nei niin a sawi.

MPCC President chuan tunhma chuan RTI zawhnate official-ten file a inziak angin an chhang mai ṭhin tih sawiin, "File-a inziak bak tihdanglam thiang a ni lo. Tunah erawh chuan kan minister-te'n an enpui zel tawh a, an duh angin an ziak mai niin a ngaih theih. Chanchinbuahte kan hmu a ni. Kan Chief Minister berin RTI thianghlimna leh hlutna tidanglam thei tur zawnga RTI a rintlak loh a tite hi a awm ang lo hlein ka hria," a ti.