Sialsukin Best Tourism Village an dawng

Ministry of Tourism-in World Tourism Day denchhena a buatsaih ‘Best Tourism Village Competition 2024’ ah Sialsuk khua chuan category panga zinga pakhat 'Community Based Tourism' ah Best Tourism Village lawmman an dawng.

Nimina World Tourism Day lawmna New Delhi a neihah vice president Jagdeep Dhankhar leh Union Tourism minister Gajendra Singh Shekhawat hnen aṭangin Best Tourism Village lawmman hi bialtu MLA Baryl Vanneihsangi Tlau leh Tourism secretary Dr Lalrozamate'n an dawng.

Intihsiaknaah hian state 30 aṭangin khaw 991 an inlan a, chung khaw 991 te chu category hrang hrang pariatah thliar leh niin, chuta ṭang chuan khaw 36 te chu lawmman la tura thlan chhuah leh an ni.

Sialsuk khua ah hian mi cheng 2370 awmin, chhungkaw 27 in tourism kaihhnawihin ei an zawng a ni. Tourism aṭanga sum lut za a sawm hi an khaw health care tih changtlun nan an hmang ṭhin.

Sialsukah hian homestay 10 awmin khum 30 a awm a, kum khat chhungin mi 15,000 aṭanga 20,000 velin Sialsuk hi an tlawh ṭhin anga chhut a ni. Siaksuk Village Council kaihhruainain Sialsuk Tlang Committee (Sialsuk Ecotourism Development Committee) din a ni a, anni hian tourism tih hmasawnna tur kawng hrang hrang an dap ṭhin a ni.

Best Tourism Village Competition hi kum 2023 atang khan Ministry of Tourism hian World Tourism Day denchhenin a buatsaih ṭan a, a hmasa ber atan Reiek khuain Best Tourism Village an lo la tawh a ni.