HM-in Champhai SP pisa a tlawh

Home minister K Sapdanga chuan September 26, Ningani khan Champhai SP pisa a tlawh a; Champhai District Executive Force (DEF) hotute nen inkawmin, sorkarin ruihhlo leh dan phal loh thil dangte a dona kawnga Mizoram Police-te hnathawh a chhuan thu a sawi.

K Sapdanga chuan, Mizoram sorkarin ruihhlo leh kuhva tawlh ruk dona kawngah theihtawp a chhuah tih a sawi a, "Kuminah August thla thleng khan ruihhlo cheng nuai 1,600 man hu man a ni tawh a, a kaihhnawihah mi 355 man an ni tawh. Sorkarin ruihhlo leh dan phal loh thil dangte a dona kawnga Mizoram Police-te hnathawh hi ka chhuang a, sorkar innghahna in nih angin thawkrim zel ang che u," a ti a, police-te hnathawh chu beiseina sang tak nen an lo thlir zel dawn thu a sawi.

Champhai additional SP Lalmal-sawma Hnamte tarlan danin, Champhai district-ah hian police station pathum - Champhai, Zokhawthar leh Dungtlang PS a awm a, Hnahlan leh Farkawnah Beat Post a awm bawk. District Executive Force-te bakah Assam Rifles (2nd leh 42nd Battalion)-te chu hmun pasarihah inkhuarin venhimna an kalpui mek a ni.

Nimin zing vek khan UDPA enkawltu minister K Sapdanga hian Chhangphut Field (CDFA Playground) leh SASCI sum cheng vbc 4.45 hmanga floodlight bun mek a tlawh nghal a; sorkar hotute leh Champhai District Football Association hruaituten an ṭawiawm.