MPCC-in Farm Law ṭha an ti lo

Mizoram Pradesh Congress Committee (MPCC) chuan, The Farmers’ Produce Trade and Commerce (Promotion and Facilitation) Act, 2020 chu loneitute mi hausa leh sumdawng liante laka an tluk luh theihna tur a nih avangin Congress party-in ṭha an tih loh thu an tarlang.

MPCC chuan, The Farmers’ Produce Trade and Commerce (Promotion and Facilitation) Act, 2020 leh dan dangte chu loneitute tana him tâwk loa ngaiin ram pum huapin Indian National Congress (INC)-in dodalna an lantir mek thu an sawi a, "He dan thar hian loneitu mi rethei zawkte chu mi hausa leh sumdawng lian zawkte laka an tluk luh theihna tur kawng hawngtu a nih avangin Congress party chuan ṭha a ti lo a ni," an ti.

Loneitute kaihhnawih an tharte chu Parliament monsoon session-ah pass a ni tawh tih sawiin MPCC chuan, "Loneitute tan a him tâwk loh avangin India ram pumah dodalna nasa taka lantir mek a ni. Heng dante hi Mizoram tan pawi lutuk lo angin lang mah se, hun lo awm zel turah Mizorama loneitute tana a him loh theih avangin kaltlangpui loh ni se tih hi kan ngaihdan a ni," an ti a; a taka hman a nih loh nan theihtawp chhuah turin Mizoram mipui an sáwm a ni.